Voleıboldan Qazaqstan chempıonaty: «Jetisý» Taldyqorǵanda «Qýanysh» komandasymen upaı bólisti
ASTANA. KAZINFORM — Voleıboldan áıelderdiń ulttyq lıga komandalary arasynda Qazaqstan chempıonatynyń úshinshi týrynda «Jetisý» Taldyqorǵanda «Qýanysh» klýbyn (SQO) qabyldady.
Taldyqorǵandyqtar bıyl óz tarıhynda onynshy ret el chempıony atansa, soltústikqazaqstandyqtar kúmis júldeni qanaǵat tutqan edi.
Bul joly birinshi oıynda serbııalyq maman Marko Grshıch jattyqtyratyn «Jetisý» 3:0 (25:23, 25:19, 25:18) esebimen jeńiske jetti.
Ekinshi kezdesýde alǵashqy eki partııany «Qýanysh» (bas bapkeri — túrkııalyq Saım Pakkan) óz esebine jazdy — 25:5, 26:24. Degenmen budan keıin alań ıeleri tarazy basyn teńestirdi — 25:22, 25:14. Áıtse de sheshýshi, besinshi set qonaqtardyń enshisinde ketti — 16:14. Qorytyndy esep — 3:2, «Qýanyshtyń» paıdasynda.
Osylaısha, qos komanda bir-bir jeńisti qanaǵat tutty.
Qazirgi kezde týrnır kestesinde «Jetisý» 16 upaımen kósh bastasa, «Qýanysh» (14 upaı) ekinshi orynda.
Ázirge jeńilistiń aşy dámin tatpaǵan Óskemenniń «Bereli» (12 upaı) úzdik úshtikti túıindep tur. Eger 31 qazan jáne 1 qarasha kúngi jalǵasatyn úshinshi týrda óskemendikter Aqtóbede jergilikti komandany eki ret qapy qaldyrsa, kósh basyna shyǵady.
Eske sala keteıik, budan buryn voleıboldan Qazaqstan chempıonatynda úsh birdeı komanda jeńilissiz kele jatqanyn jazǵan edik.
