Voleıboldan Qazaqstan chempıonaty: «Jetisý» klýby jeńis serııasyn 9 matchqa jetkizdi

ASTANA. KAZINFORM — Taldyqorǵan men Aqtóbe qalalarynda voleıboldan áıelderdiń ulttyq lıga komandalary arasynda HHHIV Qazaqstan chempıonaty ekinshi týrynyń oıyndary ótip jatyr.

Taldyqorǵanda A tobynda jergilikti «Jetisý», «Berel» (Óskemen), «Turan» (Túrkistan) jáne «Almaty» komandalarynyń basy qosyldy.

Sársenbi kúni ortalyq matchta el chempıony «Jetisý» men kúmis júldeger «Berel» klýby alańǵa shyqty. Tartysty ótken birinshi partııada taldyqorǵandyqtar 26:24 esebimen basym tússe, ekinshisinde esepti eseledi – 25:17. Úshinshi setti óskemendikter (25:23) alǵanymen, odan árige shamasy jetpedi – 23:25. Qorytyndy esep – 3:1, «Jetisýdyń» paıdasynda.

Osylaısha, serbııalyq maman Marko Grshıchtiń shákirtteri jeńis serııasyn 9 matchqa jetkizip, 26 upaımen kósh bastap keledi.

Jańa maýsymda «Qýanysh» (SQO) komandasynyń da qarqyny jaqsy. Birinshi týrda tek «Jetisýǵa» ese jibergen soltústikqazaqstandyqtar Aqtóbede «Astanany» 3:0 (25:14, 25:15, 25:15), «Qaraǵandyny» 3:0 (25:12, 25:11, 25:13) esebimen oısyrata utty. ıÝrıı Panchenko baptaıtyn komanda 25 upaımen ekinshi orynda tur. «Jetisý» men «Qýanyshty» birshama uzatyp alǵan «Bereldiń» qorjynynda 17 upaı bar.

Eske sala keteıik, budan buryn «Jetisý» komandasynyń «Qýanyshty» jeńip, kósh basyna shyqqanyn jazǵan edik.

Sondaı-aq erler arasynda da «Jetisý» komandasy «Aqtóbe» men «Jaıyqtan» basym tústi.