Voleıboldan Qazaqstan chempıonaty: «Jetisý» klýby «Aqtóbemen» fınaldyq básekede tarazy basyn teńestirdi
ASTANA. KAZINFORM — Aqtóbe qalasynda voleıboldan erlerdiń ulttyq lıga komandalary arasynda Qazaqstan chempıonatynyń ekinshi fınaldyq kezdesýi máresine jetti.
Bastapqy básekede Sergeı Trıkoz jattyqtyratyn «Aqtóbe» komandasy kambek jasap, «Jetisýdy» (bas bapkeri Marat Adryshev) 3:1 esebimen jeńgen edi.
Bul joly da qos klýb jeńis úshin aıanyp qalǵan joq.
«Aqtóbe» sapynda Bekarys Ǵabıtuly, Azamat Seıilhanov, Anton Kýznetsov, lıbero Mýrodjon Havazmatov, sondaı-aq ýkraınalyq baılanystyrýshy Roman Handrolın, reseılikter Andreı Samoılov, Kırıll Kostylenko bastapqy quramda shyqty.
«Jetisýdan» komanda kapıtany Aıbek Jaqsylyqov, Damır Ákimov, Nurdos Aldash, Vladıslav Kýnchenko, Mıhaıl Ýstınov, lıbero Erikjan Bóken, reseılikter, baılanystyrýshy Roman Egorov, Nıkıta Shvalev baryn saldy.
Birinshi partııada alań ıeleri eptilik tanytty – 25:21. Budan keıin taldyqorǵandyqtar kúsh alyp, kambek jasaı bildi – 25:20, 25:18, 25:21. Qorytyndy esep – 3:1.
Osylaısha, eki fınaldyq oıynnan keıin esep teńesti – 1:1. Qazaqstan chempıony beısenbi kúni ótetin úshinshi matchta anyqtalatyn bolady.
Eske sala keteıik, budan buryn voleıboldan Qazaqstan chempıonatynda altyn úshin talasta «Aqtóbe» alǵa shyqqanyn jazǵan bolatynbyz.
Sondaı-aq «Jaıyq» voleıbol klýby Qazaqstan chempıonatynyń qola júldesin jeńip aldy.
