Voleıboldan Qazaqstan chempıonaty: «Jetisý» qatarynan úshinshi ret jeńiske jetti

ATYRAÝ. KAZINFORM — Atyraý qalasynda voleıboldan erlerdiń ulttyq lıga komandalary arasynda HHHІІІ Qazaqstan chempıonatynyń birinshi týrynda «Jetisý» klýby (Taldyqorǵan) qatarynan úshinshi ret jeńiske jetti.

Marat Adryshevtiń shákirtteri búgin «Aqtóbemen» synǵa tústi.

Senbi kúni «Tarazben» sýperkýbok oıyny ótetindikten shyǵar, «Aqtóbeniń» bas bapkeri Sergeı Trıkoz búgingi kezdesýge ekinshi quramdy shyǵardy.

Osyǵan deıin «Aqtóbe» men «Jetisý» 5 upaımen ekinshi-úshinshi orynda turǵan edi.

Taldyqorǵandyqtar 3:0 (25:19, 25:21, 25:22) esebimen basym túsip, 8 upaımen týrnır kestesinde birinshi orynǵa kóterildi. Degenmen búgin "Taraz» «Esildi» utsa, qaıtadan kósh bastaıdy.

Eske sala keteıik, budan buryn «Taraz» voleıbol klýbynyń el chempıonatynda kósh bastaǵanyn jazǵan bolatynbyz.