Voleıboldan Qazaqstan chempıonaty: «Jetisý» fınalǵa joldama aldy

ASTANA. KAZINFORM – Óskemende voleıboldan áıelderdiń ulttyq lıga komandalary arasynda Qazaqstan chempıonatynyń kezekti oıyny ótti. Taldyqorǵandyq «Jetisý» komandasy fınalǵa joldama aldy. 

Serbııalyq maman Marko Grshıchtiń voleıbolshylary osyǵan deıin eki jyl qatarynan fınalǵa shyǵa almaǵan edi. Olar bul joly sonyń esesin qaıtardy. 

«Jetisýdyń» jartylaı fınaldaǵy qarsylasy Túrkistannyń «Turany» (bas bapkeri Asqar Shalqybekov) ótken jyly óz tarıhynda alǵash ret el chempıony atanǵan bolatyn. 

Tartysqa toly oıynnyń birinshi partııasynda taldyqorǵandyqtar aıqyn basymdylyq tanytty – 25:16. Ekinshi kezeńde túrkistandyqtar 22:18 esebimen alǵa shyqqanymen, sol qarqynynan aıyrylyp qaldy – 23:25. Sheshýshi partııada «Jetisý» oıynnyń núktesin qoıdy – 25:22. Qorytyndy esep – 3:0. 

Osy maýsymda Qazaqstan kýbogyna qosa sýperkýbokty jeńip alǵan taldyqorǵandyqtar el chempıondyǵynan basty úmitker ekenin taǵy bir dáleldedi. Olardyń qarsylastary «Berel» (Óskemen) – «Qýanysh» (SQO) básekesinde anyqtalady. 

«Turan» bıyl tek qola júlde úshin ǵana talasady. 

«Almatyny» 3:0 (25:19, 25:22, 25:21) esebimen jeńgen «Qaraǵandy» klýby 5-oryn úshin alańǵa shyǵady. 

Eske sala keteıik, budan buryn voleıboldan Qazaqstan chempıonatynda «Jetisýdyń» jartylaı fınalda «Turandy» tize búktirgenin jazǵan bolatynbyz. 

Sondaı-aq óskemendikter «Qýanyshty» qapy qaldyrdy.