Voleıboldan Qazaqstan chempıonaty: «Jaıyq» klýby kambekpen «Aqtóbeni» utty
ORAL. KAZINFORM – Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonatynyń fınalynda «Jaıyq» pen «Aqtóbe» sheberlik baıqasty.
Bul qos úzdik komandanyń chempıondyq ataq úshin ekinshi kezdesýi edi.
Keshe «Aqtóbe» asa tartysty matchta 3:2 esebimen basym túsken bolatyn.
Sergeı Trıkoz jattyqtyratyn aqtóbelikter sapynda ótken jylǵy chempıon «Taraz» klýbynyń quramynda oınaǵan Damır Ákimov, Nadyrhan Qadyrhanov, lıbero Erikjan Bóken jáne basqa tisqaqqan voleıbolshylar óner kórsetedi.
Vıktor Kozık baptaıtyn «Jaıyqqa» basqa tájirıbeli oıynshylarmen qatar maýsym basynda tarazdyq komandadan baılanystyrýshy, ýkraınalyq Volodımır Kovalchýktyń aýysyp kelgeni belgili.
Birinshi partııa óte shıelenisti ótip, sáttilik aqtóbelikter jaǵynda boldy – 30:28.
Esesine ekinshisinde «Aqtóbe» des bermedi – 25:16. Olar úshinshi sette de chempıondyqqa jaqyn turdy. Esep 20:23 bolǵan mezette «Jaıyq» quramyndaǵy Borıs Kempa sátti dop bere bildi – 25:23.
Tórtinshi partııada esep 21:23 bolǵanda, Vladımır Prokofev dop bergende, «Jaıyq» alǵa shyqty – 24:23. Sosyn tarazy basyn aýdara bildi – 26:24.
Besinshi partııa alań ıeleriniń paıdasyna sheshildi – 18:16. Qorytyndy esep – 3:2.
Osylaısha, «Jaıyq» 0:2 esebimen utylyp jatyp, jeńisti julyp aldy.
Kambek jasaý úshin kapıtan Vıtalıı Vorıvodın, Vıtalıı Erdshteın, Borıs Kempa, Vladımır Prokofev, reseılik Mıhaıl Morovtar komandasyn órge súıreı bildi. Sondaı-aq baılanystyrýshy Ýmıd Nabıev oıynǵa sátti qosyldy.
- Biz tek Batys Qazaqstan oblysy ǵana emes, búkil qazaqstandyq jankúıerlerge voleıbol merekesin syılaýǵa tyrystyq. Búgin ulttyq lıga deńgeıin kórsetetin ádemi oıyn boldy. Osydan keıin voleıbolǵa bet buratyn jas jetkinshekter sany artsa, men tek qýanyshtymyn, - dedi «Jaıyqtyń» bas bapkeri Vıktor Kozık.
«Aqtóbeni» jattyqtyratyn Sergeı Kozık te oıynshylardyń bul básekege bar kúshin jumsaǵanyn jetkizdi.
Erteń qos klýb úshinshi, sheshýshi kezdesýin ótkizip, Qazaqstan chempıony anyqtalady.
Eske sala keteıik, budan buryn «Aqtóbeniń» chempıondyq úshin alǵashqy kezdesýde «Jaıyqty» jeńgenin jazǵan edik.
Sondaı-aq voleıboldan Qazaqstan chempıonatynda qola júlde úshin básekede «Atyraý» esepti teńestirdi.