Voleıboldan Qazaqstan chempıonaty: «Turan» jartylaı fınalǵa joldama aldy

ÓSKEMEN. KAZINFORM — Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonatynyń toptyq básekeleri ótip jatyr.

A tobynda eki kezdesýin jeńispen aıaqtaǵan «Turan» (Túrkistan) komandasy jartylaı fınalǵa joldama aldy.

Ótken jylǵy el chempıony aldymen «Arý-Astana» klýbyn 3:0 (25:17, 25:16, 25:17) esebimen tize búktirdi.

Búgin Asqar Shalqybekovtiń shákirtteri Nurlan Sadyqov jattyqtyratyn «Qaraǵandymen» alańǵa shyqty.

Matchty qaraǵandylyqtar sátti bastaǵanymen, sol qarqynyn jalǵastyra almady — 22:25. Ekinshi sette túrkistandyqtar aıqyn basymdylyq tanytty — 25:17. Sodan keıin úshinshi partııany jeńispen túıindedi — 25:23. Qorytyndy esep — 3:0.

«Turan» sapynda komanda kapıtany Maıra Qoldına, Bota Ýataeva, Svetlana Nıkolaeva, belgııalyq Domınıka Strýmılo, reseılik ıÝlııa Prokofeva sııaqty oıynshylar erekshe kózge tústi.

Osylaısha, A tobynan úzdik shyqqan «Turan» fınalǵa shyǵý úshin «Jetisý» komandasymen talasady.

B tobynda reseılik ıÝrıı Panchenko jattyqtyratyn «Aqtóbe» klýby keshe kútpegen jerden «Almatydan» (bas bapkeri Rafael Gılıazýtdınov) aılasyn asyryp ketti — 3:0 (25:18, 25:18, 26:24).

Búgin aqtóbelikter «Qýanysh» (SQO) komandasymen sheberlik baıqasady. 

Eske sala keteıik, budan buryn voleıboldan Qazaqstan chempıonatynda pleı-off kezeńine shyqqan komandalar anyqtalǵanyn jazǵan bolatynbyz.