Voleıboldan Qazaqstan chempıonaty: «Turan» fınalda birinshi matchta jeńiske jetti

TÚRKІSTAN. KAZINFORM — Túrkistan qalasynda voleıboldan áıelderdiń Ulttyq lıga komandalary arasynda HHHІІ Qazaqstan chempıonatynda alań ıeleri – «Turan» men «Berel» (ShQO) klýbtary fınaldaǵy alǵashqy matchyn ótkizdi.

Buǵan deıin qos komanda da chempıon atanyp kórmegen edi.

Asqar Shalqybekov baptaıtyn túrkistandyqtardy bıyl altynǵa talasady dep kóp eshkimniń kúte qoımaǵany anyq. Onyń ústine «Turan» birinshilik barysynda ótken jylǵy kúmis júldeger, bıyl Azııa klýbtyq chempıonatyna qatysatyn «Qýanyshtan» (SQO) eki ret utylǵan bolatyn. Sonyń esesin A.Shalqybekovtiń shákirtteri jartylaı fınalda qaıtara bildi. Óskemenniń «Altaıy» quramynda talaı bıikti baǵyndyrǵan Qazaqstan ulttyq quramasynyń kapıtany, 34 jastaǵy Sana Anarqulova sheshýshi básekelerde sátti oınaı aldy. Komanda kapıtany, 36 jastaǵy Maıra Koldına, 24-tegi Janna Syroeshkına, qytaılyq Sýn Sıaosıýan, lıbero Sandýǵash Asanova syndy oıynshylar jeńiske óz úlesterin qosty. 

Oral voleıbolynyń túlegi S.Anarqulova fınalda óziniń burynǵy komandalastaryna qarsy keldi deýge bolady. Óıtkeni «Bereldiń» quramyndaǵylar negizinen buryn «Altaıdyń» namysyn jyrtqandar edi. Komanda kapıtany Krıstına Anıkonova, Svetlana Nıkolaeva, reseılik Irına Malkova, serbııalyqtar Sara Sakradzııa, baılanystyrýshy Aleksandra Chırovıch, Qazaqstannyń beldi lıberolary Mádına Beket pen Tomırıs Saǵymbaevaǵa osy maýsymda Taldyqorǵannan túlep ushqan 21 jastaǵy shabýylshy Bota Ýataeva qosyldy. Óskemendikterdiń bas bapkeri Rıshat Gılıazýtdınov Qazaqstan quramasyn da qosa jattyqtyryp keledi. 

Bul joly birinshi partııada «Berel» alda kele jatyr edi. Alaıda J.Syroeshkınanyń dop berýdegi sheberligi oıyn barysyn kúrt ózgertip jiberdi – 25:22.

Esesine ekinshi set sońyna taman óskemendikter sátti qımyldady – 26:24. Degenmen qalǵan eki partııada «Turan» jeńistik bergen joq – 25:22, 25:20. Qorytyndy esep – 3:1.

Seısenbi kúni qos klýb fınaldaǵy ekinshi kezdesýin ótkizedi. «Turan» jeńse, chempıon atanady.

Al «Berel» ese qaıtarsa, jeńimpaz úshinshi matchta anyqtalady.

Eske sala keteıik, budan buryn voleıboldan el chempıonatynda «Qýanysh» komandasynyń qola júldege jaqyn turǵanyn jazǵan bolatynbyz.