Voleıboldan Qazaqstan chempıonaty: Óskemenniń «Berel» komandasy fınalǵa joldama aldy

TÚRKІSTAN. KAZINFORM — Túrkistan qalasynda áıelderdiń Ulttyq lıga komandalary arasynda HHHІІ Qazaqstan chempıonatynda fınalǵa shyqqan alǵashqy klýb anyqtaldy.

«Berel» (ShQO) men «Jetisý» (Taldyqorǵan) komandalary úshinshi kezdesýinde fınal joldamasyn sarapqa saldy. Osyǵan deıin qos klýb jartylaı fınaldyq oıyndarynda bir-birden jeńiske jetken edi.

Búgin birinshi partııada óskemendikter basymdylyqty ýysynan shyǵarǵan joq – 25:19. Ekinshi set sońyna taman taldyqorǵandyqtar 23:20 esebimen alda turdy. Áıtse de Rıshat Gılıazýtdınovtyń voleıbolshylary tarazy basyn teńestirip qana qoımaı, setti óz esebine jazdy – 26:24.

Olar sońǵy partııada da sheber oıyn órnegin kórsete bildi – 25:19. Mańyzdy oıynda jeńiliske ushyraǵan serbııalyq Marko Grshıch jattyqtyratyn «Jetisý» komandasy endi qola júldegk talasady. Al «Berel» fınalǵa joldama aldy. 

Ekinshi joldama ıesi «Qýanysh» (SQO) pen «Turan» (Túrkistan) komandalary arasyndaǵy oıynda anyqtalady. 

Eske sala keteıik, budan buryn voleıboldan Qazaqstan chempıonatynda «Turannyń» «Qýanyshty» jeńgenin jazǵan bolatynbyz.