Voleıboldan Qazaqstan chempıonaty: Oraldyń «Jaıyǵy» alǵashqy eki jeńisine qol jetkizdi
ORAL. KAZINFORM — Voleıboldan erlerdiń ulttyq lıga komandalary arasynda Qazaqstan chempıonaty úshinshi týrynyń oıyndary máresine jetti.
Ótken maýsymdaǵy qola júldeger Oraldyń «Jaıyǵy» óz alańyndaǵy eki oıynyn «Qýanysh» (SQO) komandasymen ótkizdi.
Birinshi básekede alǵashqy partııada ǵana taıtalas bolyp, 26:24 esebimen alań ıeleri basym tústi. Budan keıin olar tizgindi nyq ustaı bildi – 25:17, 25:15.
Seısenbi kúngi ekinshi oıynda da oraldyqtar 3:0 (25:19, 25:14, 25:14) esebimen jeńiske jetti.
- Ótken maýsymmen salystyrǵanda, komanda quramy jańartylyp, jastarmen tolyqtyryldy. Sondyqtan daıyndyq barysynda kóp jumys isteýge týra keldi. Bul jattyqtyrý úshin de, klýb úshin de ońaı emes. Aldaǵy ýaqytta oıynshylardyń matchtan matchqa sheberligi óse túsedi dep oılaımyn, - dedi «Jaıyqtyń» bas bapkeri Vıktor Kozık.
Marat Imanǵalıev jattyqtyratyn kósh basyndaǵy «Býrevestnık» Almatyda chempıonat debıýtanty Óskemenniń «Berelin» qabyldady. Shyǵysqazaqstandyq komanda favorıtke barynsha qarsylyq kórsete aldy.
Dúısenbide «Býrevestnık» 3:1 (25:21, 22:25, 25:17, 25:14) esebimen basym tússe, asa tartysty ótken ekinshi básekesin de jeńispen túıindeı aldy – 3:2 (38:36, 15:25, 25:23, 24:26, 15:11).
Degenmen almatylyqtar alǵash ret bir upaıyn joǵaltty.
Qazaqstan chempıony «Jetisý» klýby jańa maýsymda kibirtiktep keledi. Osyǵan deıin I jáne II týrlarda Marat Adryshevtyń shákirtteri «Oqjetpes» jáne «Aqtóbe» komandalarymen upaı bólisken edi. Bul joly da solaı boldy. Taldyqorǵandyqtar syrt alańda «Tarazdan» keshe 2:3 (17:25, 25:12, 23:25, 25:20, 11:15) esebimen utylsa, búgin qarymta qaıyrdy – 3:1 (25:23, 24:26, 25:23, 25:23).
Kókshetaýdyń «Oqjetpesi» Atyraýda jergilikti klýbty 3:2 (15:25, 23:25, 25:22, 25:17, 19:17) jáne 3:0 (25:19, 25:23, 25:22) esebimen tize búktirdi.
Týrnır kestesinde «Býrevestnık» 17 upaımen kósh bastasa, «Oqjetpes» (14 upaı) ekinshi, «Jetisý» (11 upaı) úshinshi satyda.
Bastapqy týrlardyń tartysty ótýi júldeli oryndar úshin básekeniń kúsheıe túsetinin kórsetkendeı.
8-9 qarashada ótetin tórtinshi týrda almatylyqtar «Jetisýdy», «Aqtóbe» kókshetaýlyqtardy, «Jaıyq» Oralda «Bereldi», «Atyraý» soltústikqazaqstandyqtardy qabyldaıdy.
Eske sala keteıik, budan buryn voleıboldan Qazaqstan chempıonatynda Almatyda «Býrevestnıkti» Oraldyń «Jaıyǵy» toqtata almaǵanyn jazǵan edik.
