Voleıboldan Qazaqstan chempıonaty: Qola júlde úshin básekede «Jetisý» klýby «Atyraýdan» basym tústi

ORAL. KAZINFORM – Oral qalasyndaǵy «Jaıyq arena» sport kesheninde voleıboldan ulttyq lıga klýbtary arasynda júldeler úshin sheshýshi básekeler bastaldy.

Qola medal úshin alǵashqy oıynda «Jetisý» (Taldyqorǵan) men «Atyraý» komandalary alańǵa shyqty. 

Marat Adryshev jattyqtyratyn jetisýlyqtar bastapqy eki partııany óz esebine jazdy – 25:14, 25:22. Budan keıin Islam Jumabekovtiń shákirtteri qarymta qaıtaratyndaı kóringen – 25:23.

Alaıda taldyqorǵandyqtar oǵan jetkizbedi – 25:21. Qorytyndy esep – 3:1.

Erteń qos komanda ekinshi kezdesýin ótkizedi. «Jetisý» jeńse, qola júlde ıesi anyqtalady.

«Atyraý» ese qaıyrsa, úshinshi match oınalady. 

Besinshi oryn úshin básekede «Býrevestnık» ótken jylǵy kúmis júldeger «Pavlodardy» tize búktirdi – 3:0 (25:22, 25:21, 25:21).

Jetinshi saty úshin talasta ótken jylǵy chempıon «Taraz» SQO-nyń «Esilin» jeńdi – 3:0 (25:21, 25:16, 26:24). 

Eske sala keteıik, budan buryn voleıboldan Qazaqstan chempıonatynda «Jaıyq» klýbynyń fınalǵa joldama alǵanyn jazǵan edik.