Voleıboldan Qazaqstan chempıonaty: Fınaldyq kezeń «Barys arena» stadıonynda ótedi
ASTANA. KAZINFORM — Búgin «Barys arena» stadıonynda voleıboldan áıelderdiń ulttyq lıga komandalary arasynda pleı-off básekeleri bastalady.
Qazaqstan voleıbol federatsııasynan alynǵan málimetke qaraǵanda, fınaldyq kezeń «Barys arenada» alǵash ret ótkeli tur.
Turaqty chempıonattyń qorytyndysy boıynsha tórt úzdik komanda («Jetisý», «Qýanysh», «Berel», «Turan») júldeli oryndardy sarapqa salady.
Ótken jylǵy el chempıony, sýperkýbok ıegeri «Jetisý» klýby (Taldyqorǵan) jartylaı fınalda «Turanmen» (Túrkistan) kezdesedi.
Ekinshi jartylaı fınalda «Qýanysh» (SQO) pen «Berel» (Óskemen) sheberlik baıqasady. Jartylaı fınaldyq básekeler eki jeńiske deıin jalǵasady. Fınal men qola júlde úshin oıyndar da osyndaı retpen ótedi.
Qalǵan tórt komanda 5-8 oryndar úshin alańǵa shyǵady.
Sheshýshi matchtar 12 sáýirde máresine jetip, jeńimpaz ben júldeger klýbtar anyqtalady.
Eske sala keteıik, budan buryn voleıboldan «Qýanyshtyń» sońǵy oıynda «Jetisýdan» basym túskenin jazǵan bolatynbyz.
