Voleıboldan Qazaqstan chempıonaty: «Esil» kósh sońyndaǵy komandaǵa ese jiberdi

Oralda ótip jatqan voleıboldan erlerdiń Ulttyq lıga komandalary arasynda HHHІІ Qazaqstan chempıonatynyń úshinshi týrynda kútpegen nátıje tirkeldi, dep habarlaıdy Kazinform.

Osyǵan deıin úshinshi týr aıasynda jeńilissiz kele jatqan «Esil» (SQO) kósh sońyndaǵy «Ushqyn-Kókshetaýdan» utylyp qaldy.

Budan buryn soltústikqazaqstandyqtar «Atyraý» men «Tarazdy» 3:2, «Aqtóbeni» 3:0 esebimen jeńip, 24 upaımen tórtinshi orynǵa taban tiregen edi.

Búgin asa tartysty ótken matchta «Esil» kókshetaýlyqtarǵa 2:3 (33:31, 21:25, 28:26, 20:25, 8:16) esebimen ese jiberdi. Degenmen «Ushqyn-Kókshetaýda» nebári 7 upaı bar, onyń pleı-ofqa shyǵýǵa múmkindik beretin úzdik segizdikke iligýi qıyn.

El chempıony «Pavlodar» búgin «Atyraýdy» 3:0 (27:25, 25:17, 25:20) esebimen tize búktirip, 41 upaımen basqalardan qara úzip ketti.

Aldaǵy aptanyń ortalyq kezdesýinde «Pavlodar» men «Jaıyq» (Oral) komandalary sheberlik baıqasady.

Eske sala keteıik, budan buryn voleıboldan Qazaqstan chempıonatynda «Tarazdyń» qatarynan ekinshi ret jeńilip qalǵanyn jazǵan bolatynbyz.