Voleıboldan Qazaqstan chempıonaty: «Býrevestnık» alǵash ret jeńilis tapty
ASTANA. KAZINFORM — Voleıboldan erlerdiń ulttyq lıga komandalary arasynda Qazaqstan chempıonaty tórtinshi týrynyń básekeleri aıaqtaldy.
Almatyda bıylǵy maýsymdy qarqyndy bastaǵan «Býrevestnık» el chempıony «Jetisýdy» qabyldady.
Birinshi oıynda Marat Imanǵalıevtiń shákirtteri qonaqtardan 3:0 (26:24, 25:15, 25:23) esebimen basym tústi.
Ekinshi kezdesýde Marat Adryshev jattyqtyratyn taldyqorǵandyqtar ese qaıyrdy — 3:1 (25:21, 22:25, 25:19, 25:17). Bul «Býrevestnıktiń» alǵashqy jeńilisi edi. Sóıtip chempıonatta utylmaǵan komanda qalmady.
Ótken maýsymda kúmis júldeger atanǵan aqtóbelikter óz alańynda asa tartysty eki matchta Kókshetaýdyń «Oqjetpesimen» upaı bólisti — 3:2 (25:22, 22:25, 23:25, 25:18, 17:15) jáne 2:3 (23:25, 24:26, 25:18, 25:17, 12:15).
Bıyl kóktemde úzdik úshtikti túıindegen Oraldyń «Jaıyǵy» óz alańynda chempıonat debıýtanty — Óskemenniń «Berelin» 3:0 (25:18, 25:18, 25:18) jáne 3:0 (30:28, 25:20, 25:18) esebimen tize búktirdi.
Sondaı-aq atyraýlyqtar «Qýanyshty» (SQO) 3:2 (23:25, 23:25, 25:18, 25:17, 15:9) jáne 3:1 (25:16, 25:14, 17:25, 27:25) esebimen utty.
Týrnır kestesinde «Býrevestnık» 20 upaımen kósh bastasa, «Oqjetpes» (17 upaı) ekinshi, «Jetisý» (14 upaı) úshinshi orynda keledi.
Kelesi týr oıyndary 20-23 qarashada ótedi. Onda ortalyq match «Jetisý» men «Jaıyqtyń» arasynda bolmaq. Sondaı-aq «Qýanysh» aqtóbelikterdi, «Berel» atyraýlyqtardy, «Taraz» almatylyqtardy qabyldaıdy.
Eske sala keteıik, budan buryn voleıboldan Qazaqstan chempıonatynda Oraldyń «Jaıyǵy» alǵashqy eki jeńisine qol jetkizgenin jazǵan edik.
