Voleıboldan Qazaqstan chempıonaty: «Berel» ekinshi jyl qatarynan fınalǵa shyqty

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonatynyń jartylaı fınalynda «Berel» men «Qýanysh» úshinshi oıynyn ótkizdi.

Ótken jyly Rıshat Gılıazýtdınov jattyqtyratyn óskemendikter fınalǵa deıin jetip, túrkistandyq «Turanǵa» ese jiberse, «Qýanysh» (bas bapkeri Azamat Esimov) úzdik úshtikti túıindegen edi.

Bıyl qos komanda jartylaı fınalda eki márte kezdesip, bir-birden jeńiske jetken edi.

Sheshýshi, úshinshi básekede komandalar quramynda ózgeris bolǵan joq. Ekinshi matchta jaraqat alyp qalǵan óskemendik Krıstına Belova qaıta alańǵa shyqty. 

Birinshi kezeńde «Berel» aıqyn basymdylyq kórsetti – 25:13.

Ekinshi partııada soltústikqazaqstandyqtar qarsylasyp baqqanymen, óskemendikter sátti oınady – 25:19. Match Tatıana ıAtskıvtiń tosqaýyl qoıýymen aıaqtaldy – 25:23. Qorytyndy esep – 3:0.

Osylaısha, ekinshi jyl qatarynan fınalǵa shyqqan R.Gılıazýtdınov shákirtteri chempıondyq ataq úshin «Jetisý» (Taldyqorǵan) komandasymen talasady. 

«Qýanysh» qola júlde úshin «Turanmen» sheberlik baıqasady.

Eske sala keteıik, budan buryn «Qýanysh» komandasynyń «Berelmen» tarazy basyn teńestirgenin jazǵan bolatynbyz.