Voleıboldan Qazaqstan chempıonaty: Altyn úshin talasta «Aqtóbe» alǵa shyqty
ASTANA. KAZINFORM — Aqtóbe qalasynda voleıboldan erlerdiń ulttyq lıga komandalary arasynda Qazaqstan chempıonatynda altyn jáne qola medaldar úshin alǵashqy kezdesýler máresine jetti.
Fınalda Sergeı Trıkoz jattyqtyratyn «Aqtóbe» men «Jetisý» (Taldyqorǵan) sheberlik baıqasty.
Tartysty ótken básekede aldymen Marat Adryshevtiń shákirtteri birinshi sette basymdylyq tanytty — 25:22. Budan keıin alań ıeleri kambek jasaı bildi — 25:23, 25:22, 28:26.
Sársenbi kúni qos komanda ekinshi fınaldyq oıynyn ótkizedi. «Aqtóbe» utsa, chempıondyq ataqqa qol jetkizedi.
Ótken jylǵy el chempıony Oraldyń «Jaıyǵy» (bas bapkeri Vıktor Kozık) men Igor Nıkolchenko jattyqtyratyn «Atyraý» komandasy qola medal úshin talasqa tústi.
Birinshi partııany oraldyqtar (25:19) óz esebine jazsa, ekinshisinde atyraýlyqtar 25:22 esebimen ese qaıyrdy. Degenmen «Jaıyq» taǵy eki setti aldy — 25:22, 25:23. Qorytyndy esep — 3:1.
Oraldyqtar sapynda komanda kapıtany Vıtalıı Vorıvodın, Vladımır Prokofev, Borıs Kempa, Nodırhan Qadyrhanov, sondaı-aq reseılik Nıkıta Alekseev, ýkraınalyq baılanystyrýshy Volodımır Kovalchýk sátti oınaı bildi.
Osylaısha, «Jaıyq» úshinshi orynǵa bir taban jaqyndaı tústi. Endi ekinshi básekede jeńiske jetse, qola júldeger atanady.
Eske sala keteıik, budan buryn «Jetisý» men «Aqtóbeniń» Qazaqstan chempıonatynyń fınalyna joldama alǵanyn jazǵan bolatynbyz.
