Voleıboldan Qazaqstan chempıonaty: Almatyda «Býrevestnıkti» Oraldyń «Jaıyǵy» toqtata almady
ASTANA. KAZINFORM — Voleıboldan erlerdiń ulttyq lıga komandalary arasynda Qazaqstan chempıonaty ekinshi týrynyń oıyndary máresine jetti.
Birinshi týrdan keıin kósh bastaǵan «Býrevestnık» Almatyda el birinshiliginiń qola júldegeri — Oraldyń «Jaıyǵyn» qabyldady.
Qos komandada da jańa maýsymda birqatar ózgerister boldy.
Beısenbi kúngi oıynda alań ıeleri oraldyqtardy 3:0 (25:22, 25:20, 25:20) esebimen tize búktirdi.
Búgin aldymen «Býrevestnık» 25:18 esebimen alǵa shyqty. Ekinshisinde «Jaıyq» ese qaıtardy — 25:16. Alaıda odan árige shamasy jetpedi — 15:25, 22:25. Qorytyndy esep — 3:1, almatylyqtardyń paıdasynda.
Osylaısha, upaı sanyn 12-ge jetkizgen «Býrevestnık» týrnır kestesinde jeke-dara alda keledi.
Qazaqstan chempıony «Jetisý» Taldyqorǵanda kúmis júldeger «Aqtóbemen» upaı almasty.
Tartysty ótken birinshi básekede aqtóbelikter 3:2 (26:24, 20:25, 21:25, 25:21, 15:12) esebimen basymdylyq tanytty. Ekinshisinde taldyqorǵandyqtar qarymta qaıyrdy — 3:0 (25:17, 25:17, 25:16).
Atyraýlyqtar Qarataý qalasynda «Tarazdy» eki ret qapy qaldyrdy — 3:1 (24:26, 25:16, 34:32, 25:20) jáne 3:2 (23:25, 15:25, 25:20, 25:15, 15:12).
«Oqjetpes» (Aqmola) Óskemende jergilikti «Berelge» esh múmkindik qaldyrmady — 3:0 (25:11, 25:15, 29:27) jáne 3:0 (25:16, 25:18, 25:18).
Aqmolalyqtar 9 upaımen ekinshi orynǵa jaıǵassa, «Jetisý» (7 upaı) úzdik úshtikti túıindep tur.
Úshinshi týr oıyndary 3-4 qarashada ótedi.
Eske sala keteıik, budan buryn voleıboldan Qazaqstan chempıonatynda «Býrevestnık» komandasy kósh bastaǵanyn jazǵan edik.
