Voleıboldan Qazaqstan chempıonaty alǵashqy týrynyń oıyndary aıaqtaldy
ASTANA. KAZINFORM — Voleıboldan áıelderdiń ulttyq lıga komandalary arasynda Qazaqstan chempıonatynyń birinshi týrynda alań ıeleri jeńiske jetti.
Qazaqstan chempıony jáne sýperkýbok ıegeri «Jetisý» klýby Taldyqorǵanda senbi kúni Pavlodardyń «Ertisin» 3:0 (25:10, 25:16, 25:13) esebimen jeńdi.
Taldyqorǵandyqtar jeksenbi kúni de des bergen joq — 3:0 (25:11, 25:15, 25:20).
Sondaı-aq «Berel» klýby Óskemende Almatynyń «Býrevestnık» komandasyn bastapqyda 3:0 (25:16, 25:17, 25:16) esebimen qapy qaldyrdy. Óskemendikter ekinshi kúni de basymdylyq tanytty — 3:1 (23:25, 25:15, 25:17, 25:16).
«Qýanysh» klýby Petropavlda «Qaraǵandy» komandasyn 3:1 (25:16, 25:23, 23:25, 25:14) jáne 3:0 (25:18, 25:11, 25:22) esebimen tize búktirdi.
Sol sekildi «Turan» Túrkistanda «Aqtóbeden» eki matchta da 3:0 (25:16, 25:17, 25:19) jáne (25:17, 25:10, 25:13) esebimen aılasyn asyrdy.
Ekinshi týrda 15-16 qazanda «Berel» — «Qaraǵandy», «Qýanysh» — «Ertis», «Býrevestnık» — «Aqtóbe», «Turan» — «Jetisý» komandalary ózara sheberlik baıqasyp, eki oıynnan ótkizedi.
Aıta keteıik, Qazaqstannyń ulttyq voleıbol lıgasy 2026-2027 jylǵy maýsymnan bastap jańa formatqa kóshti.
Bul júıege sáıkes komandalar óz alańynda jáne qonaqta eki matchtan oınaıdy.
Qazaqstan voleıbol federatsııasynyń málimeti boıynsha jańa format chempıonattyń sapasy men básekelestigin arttyrýǵa, klýbtyq ınfraqurylymdy damytýǵa jáne komandalar men jankúıerler arasyndaǵy baılanysty nyǵaıtýǵa baǵyttalǵan.
Eske sala keteıik, budan buryn voleıboldan Azııa chempıonatynda Qazaqstan quramasynyń Aýstralııadan basym túskenin jazǵan edik.
