Voleıboldan fınaldyq kezeń: «Qýanysh» sýper kambekpen «Bereldi» jeńdi
ASTANA. KAZINFORM — Astana qalasyndaǵy «Barys arena» stadıonynda voleıboldan áıelderdiń ulttyq lıga komandalary arasynda Qazaqstan chempıonatynyń fınaldyq kezeńi bastaldy.
Birinshi jartylaı fınalda ótken jylǵy el chempıony, bıylǵy sýperkýbok ıegeri «Jetisý» (Taldyqorǵan) men «Turan» (Túrkistan) komandalary alańǵa shyqty.
Turaqty chempıonatta serbııalyq maman Marko Grshıch jattyqtyratyn taldyqorǵandyqtar kóshtiń aldyn bermese, «Turan» (bas bapkeri Asqar Shalqybekov) tórtinshi orynmen shektelgen edi.
Bul oıynda «Jetisý» qarsylastaryna esh múmkindik qaldyrmady — 3:0 (25:17, 25:14, 25:8). «Jetisýdan» komanda kapıtany, reseılik shabýylshy Marııa Frolova, «Turannan» baılanystyrýshy Irına Kýznetsova úzdik oıynshy atandy.
Ekinshi jartylaı fınaldyq kezdesýde «Qýanysh» (SQO) pen «Berel» (Óskemen) sheberlik baıqasty.
ıÝrıı Panchenko baptaıtyn soltústikqazaqstandyqtar chempıonatty ekinshi orynmen aıaqtasa, óskemendikter (bas jattyqtyrýshy — serbııalyq Vladımır Vasovıch) úzdik úshtikti túıindegen edi.
Bul joly matchty qarqyndy bastaǵan «Berel» (kapıtany Irına Malkova) bastapqy eki partııany óz esebine jazdy — 25:23, 25:21.
Esesine úshinshi sette Qazaqstan ulttyq quramasynyń kapıtany Sana Anarqulova bastaǵan «Qýanysh» 9:2 esebimen alǵa ketip, sol arynyn joǵaltpady — 25:10. Tórtinshi kezeńde de «Qýanyshtyń» basymdylyǵy baıqaldy — 25:20.
Sheshýshi, besinshi sette «Berel» 9:3, 12:5 esebimen alda turdy. Soǵan qaramastan, «Qýanysh» sýper kambek jasaı bildi — 17:15. Qorytyndy esep — 3:2.
Seısenbi kúni komandalar ekinshi jartylaı fınaldyq matchyn ótkizedi. Eki jeńiske qol jetkizgen klýb fınalǵa joldama alady.
Pleı-off kezeńinde 5-8 oryndar úshin básekede «Qaraǵandy» klýby «Astanany» qapy qaldyrdy — 3:0 (25:16, 25:15, 25:25:21). Al aqtóbelikter bes partııada «Almatydan» aılasyn asyrdy — 3:2 (18:25, 25:16, 25:14, 20:25, 15:10).
Eske sala keteıik, budan buryn voleıboldan Qazaqstan chempıonatynda fınaldyq kezeń «Barys arena» stadıonynda ótetinin jazǵan bolatynbyz.