Voleıboldan fınaldyq kezeń: «Aqtóbe» kambekpen «Jaıyqty» jeńdi
ASTANA. KAZINFORM — Aqtóbe qalasynda voleıboldan erlerdiń ulttyq lıga komandalary arasynda Qazaqstan chempıonatynyń alǵashqy jartylaı fınaldyq kezdesýleri aıaqtaldy.
Sergeı Trıkoz jattyqtyratyn alań ıeleri jartylaı fınalda ótken jylǵy el chempıony «Jaıyqpen» sheberlik baıqasty. Birinshi partııada oraldyq Vıktor Kozıktiń shákirtteri 25:22 esebimen basymdylyq tanytty.
Asa tartysty ótken ekinshi sette aqtóbelikter ese qaıyrdy – 29:27. Odan keıin de sol qarqyndarynan tanǵan joq – 25:20. Tórtinshi partııada esep 24:21 bolǵanda, oraldyqtar tarazy basyn teńestire bildi. Biraq odan árige shamalary jetpedi – 26:28. Qorytyndy esep – 3:1, «Aqtóbeniń» paıdasynda.
Marat Adryshev baptaıtyn «Jetisý» klýby «Atyraýdan» (bas jattyqtyrýshy Igor Nıkolchenko) 3:0 (25:23, 25:22, 25:23) esebimen aılasyn asyrdy.
Erteń komandalar ekinshi jartylaı fınaldyq básekelerin ótkizedi. Onda «Aqtóbe» men «Jetisý» jeńse, fınalǵa joldama alady. «Jaıyq» pen «Atyraý» qarymta qaıyrsa, úshinshi match oınalady.
Eske sala keteıik, budan buryn búgin voleıboldan Qazaqstan chempıonatynyń sheshýshi oıyndary bastalatynyn jazǵan bolatynbyz.
