Voleıboldan erler komandalary arasyndaǵy QR Prezıdenti kýbogynda «Qazaqstan-1» quramasy kósh bastap kele jatyr
ALMATY. 1 qyrkúıek. QazAqparat - Voleıboldan Almatydaǵy Balýan Sholaq atyndaǵy sport saraıynda ótip jatqan «QR Prezıdenti kýbogy» HІH Halyqaralyq týrnırinde keshe jeńilissiz kele jatqan qytaılyqtar men taılandtyqtar da jeńilistiń aşy dámin tatty.
Bul kúni Qazaqstannyń jastar quramasy («Qazaqstan-2») úshinshi ret jeńilis tapty. Al Qytaıdyń Beıjiń qalasynyń «BAIC Motor» komandasy kútpegen jerden bahreındikterge 1:3 (23-25, 25-27, 25-21, 21-25) esebimen ese jiberdi. Al «Qazaqstan-1» ulttyq quramasy taılandtyqtardy 3:0 (25-22, 25-18, 25-13) esebimen oısyrata utty. Buǵan deıin qytaılyqtar «Qazaqstan-2» (3:0) men «Qazaqstan-1» (3:1) quramalaryn, taılandtyqtar «Týnıs» (3:0) pen «Qazaqstan-2» (3:1) komandalaryn jeńgen edi. Al týnıstikter taılandtyqtarǵa (0:3) jeńilgenimen bahreındikterdi (3:1) utsa, «Qazaqstan-1» quramasy bahreındikterdi (3:0) jeńgenimen, qytaılyqtardan (1:3) jeńilis tapqan bolatyn. Búgin barlyq komandalar bir kún tynyǵyp, erteń «Bahreın» men «Qazaqstan-2», «BAIC Motor» men «Taıland», «Qazaqstan-1» men «Týnıs», al arǵy kúni «Taıland» pen «Bahreın», «Týnıs» pen «BAIC Motor», «Qazaqstan-2» men «Qazaqstan-1» aqtyq kezdesýlerin ótkizedi. Qazir týrnır kestesinde birdeı 6 upaı jınaǵanymen, oınalǵan partııalar qatynasy boıynsha qazaqstandyqtar («Qazaqstan-1») birinshi, qytaılyqtar ekinshi, týnıstikter úshinshi, taılandtyqtar tórtinshi, 3 upaımen bahreındikter besinshi, al qorjynynda áli birde-bir upaıy joq Qazaqstannyń jastar quramasy altynshy orynda kele jatyr.
