Voleıboldan erler komandalary arasyndaǵy QR Prezıdenti kýbogynda «Qazaqstan-1» quramasy ekinshi oryn aldy
ALMATY. 4 qyrkúıek. QazAqparat - Almatyda 29 tamyz ben 3 qyrkúıek aralyǵynda voleıboldan erler arasynda «QR Prezıdenti kýbogy» HІH halyqaralyq týrnıri ótti.
Onda tek «Taıland» quramasyna (0:3) ǵana jeńilgen Týnıs quramasy 11 upaımen kýbok ıegeri atandy. Al 9 upaı jınaǵan «Qazaqstan-1», «Taıland», «Bahreın» sportshylary 2-4 oryndy bólisti. Qytaıdyń Beıjiń qalasynyń ««BAIC Motor» komandasy 7 upaımen besinshi oryn alsa, qorjynyna birde-bir upaı sala almaǵan «Qazaqstan-2» jastar quramasy sońǵy satyǵa taban tiredi.
Týrnır jeńimpazynyń taǵdyry «Taıland» pen «Bahreın», «Týnıs» pen «BAIC Motor», «Qazaqstan-2» men «Qazaqstan-1» arasyndaǵy aqtyq oıynda sheshildi. Tórt kezdesýdiń qorytyndysy boıynsha kósh bastap turǵan taılandyqtar 5-inshi orynda turǵan bahreındikterge 1:3 esebimen ese jiberdi. Al qytaılyqtardan 3:2 basym túsken týnıstikter qorjynyna 2 upaı qosyp, týrnır jeńimpazy mártebesin ıelendi. «Qazaqstan-1» quramasy bolsa jastardy oısyrata utyp, taılandyqtardy qýyp jetip, partııalardyń koeffıtsıenti boıynsha qarsylasyn týrnır kestesinde bir saty tómendetýge múmkindik aldy.
