Voleıboldan elimizdiń erler quramasy Katarǵa attanady
ASTANA. 17 qańtar. QazAqparat - Gennadıı Parshın baptaıtyn voleıboldan elimizdiń erler quramasy jattyǵý jıynyn ótkizý úshin Katarǵa jol júredi.
Doha qalasynda bolatyn oqý-jattyǵý sharasy 2 aqpanǵa deıin sozylady.
Bas bapker ulttyq qurama sapyna 13 sportshyny shaqyrypty. Olar: ıÝrıı Stýlov (1980), Dmıtrıı Gorbatkov (1981), Anton ıÝdın (1982), Alekseı Gýtor (1984), Vıtalıı Mıronenko (1985), Áset Bazarqulov (1987), Maksım Mamedov (1987), Evgenıı Gorchanıýk (1987), Sergeı Okýnev (1990), Nádirhan Kádirhanov (1991), Vıtalıı Erdshteın (1992), Oleg Verıgın (1992), Sergeı Kýznetsov (1993). Bul oıynshylardyń bári voleıboldan byltyr el chempıony atanǵan "Almaty" klýbynyń múshesi.
Parshın ulttyq quramanyń beldi oıynshynyń birazyn tizimnen syzyp tastap, olardyń ornyna birneshe jasty qosypty.
Bıyl voleıboldan erler arasynda Azııa chempıonaty Birikken Arab Ámirliginde 28 qyrkúıek pen 6 qazan aralyǵynda ótedi, dep habarlaıdy «Alaman» agenttigi.
