Voleıboldan el chempıonatynda «Jetisý» jeńis serııasyn 17 matchqa jetkizdi

ASTANA. KAZINFORM — Óskemen jáne Aqtóbe qalalarynda voleıboldan áıelderdiń ulttyq lıga komandalary arasynda Qazaqstan chempıonaty ІІІ kishi týrynyń oıyndary máresine jetti.

Óskemende ortalyq matchta ótken jylǵy chempıon «Jetisý» men kúmis júldeger, alań ıeleri «Berel» sheberlik baıqasty.

Serbııalyq maman Marko Grshıch jattyqtyratyn taldyqorǵandyqtar bul joly da des bergen joq — 3:0 (25:20, 25:23, 25:10).

Osylaısha, chempıonat bastalǵannan beri utylmaı kele jatqan «Jetisý» jeńis serııasyn 17 matchqa jetkizdi. Qazirgi kezde taldyqorǵandyq klýb 49 upaımen jekedara kósh bastap keledi.

Soltústikqazaqstandyq «Qýanysh» 45 upaımen ekinshi orynǵa ornyqsa, «Berel» (37 upaı) úzdik úshtikti túıindep tur. 

«Qýanysh» Aqtóbe qalasyndaǵy úsh kezdesýin de jeńispen aıaqtady.

Bıyl óz tarıhynda alǵash ret el kýbogyn jeńip alǵan «Turan» (Túrkistan) 24 upaımen tórtinshi satyǵa taban tiredi. Biraq olardy 23 upaımen «Qaraǵandy» ókshelep keledi.

Birinshiliktiń úshinshi úlken týr básekeleri 27 qańtar — 2 aqpan aralyǵynda Óskemen qalasynda ótedi.

Eske sala keteıik, budan buryn voleıboldan «Jetisý» komandasy sýperkýbokty besinshi ret jeńip alǵanyn jazǵan edik.