Voleıboldan el chempıony ataǵyna talasatyn komandalar anyqtaldy
NUR-SULTAN. QazAqparat – Taraz qalasynda erlerdiń Ulttyq lıga komandalary arasynda HHH QR chempıonatynyń pleı-off básekeleri márege jetti, dep habarlaıdy QazAqparat tilshisi.
Jartylaı fınalda «Taraz» - «Esil» (SQO) jáne «Atyraý» - «Býrevestnık» (Almaty) komandalary ózara myqtyny anyqtady.
Borıs Grebennıkov jattyqtyratyn tarazdyqtar chempıonatta kósh bastap kele jatqan. Alaıda jartylaı fınaldyq matchtarda súrinip, óz múmkindikterin paıdalana almady. Sóıtip kútpegen jerden «Esilge» 2:3, 2:3 esebimen jol berdi.
Ótken jylǵy el chempıony «Býrevestnık» pen «Atyraý» básekesi asa tartysty ótti. Birinshi oıynda Aleksandr Zapevalovtyń shákirtteri jeńisti julyp aldy – 3:2. Alaıda ekinshi kezdesýde Vıktor Kozık jattyqtyratyn atyraýlyqtar tarazy basyn teńestirdi – 3:0. Sodan keıin úshinshi, sheshýshi oıynda «Atyraý» 3:1 esebimen basym túsip, fınalǵa joldama aldy.
Osylaısha bıyl «Atyraý» men «Esil» bas júldeni sarapqa salyp, jańa chempıon anyqtalady. «Býrevestnık» pen «Taraz» qola júlde úshin alańǵa shyǵatyn bolady.
Ótken jyly «Býrevestnık» altyn, «Mańǵystaý» kúmis, «Esil» qola medalǵa ıe bolsa, «Atyraý» tórtinshi oryndy qanaǵat tutqan edi.
Eske sala keteıik, budan buryn áıelder komandalary arasynda «Altaıdyń» alty dúrkin el chempıony atanǵanyn jazǵan bolatynbyz.
