Voleıboldan el chempıonaty: «Jetisý» jeńilmeı kele jatqan komandany utty

ÓSKEMEN. KAZINFORM – Voleıboldan áıelderdiń ulttyq lıga komandalary arasynda Óskemen qalasynda ótip jatqan XXXIII Qazaqstan chempıonatynyń birinshi týrynda «Jetisý» (Taldyqorǵan) men «Qaraǵandy» klýbtary ózara kezdesti.

Osyǵan deıin qaraǵandylyq komanda qatarynan bes ret jeńiske jetse, taldyqorǵandyqtar tartysty matchta tek óskemendik «Berelge» ese jibergen edi.

Bul joly «Jetisý» (bas bapkeri Marko Grshıch) Nurlan Sadyqov jattyqtyratyn «Qaraǵandyny» erkin utty – 3:0 (25:17, 25:13, 25:14).

Osy jeńisten keıin 16 upaı jınaǵan taldyqorǵandyqtar kósh basyna kóterildi. Biraq búgin «Berel» Túrkistannyń «Turanyn» utsa, onda óskemendik klýb birinshi orynǵa shyǵady.

«Almaty» - «Gratsııa KZ» matchynda birinshi partııa barynsha tartysty órbidi. Degenmen tájirıbesi basym almatylyqtar oıyn tizginin óz qolyna ala bildi – 3:0 (25:20, 25:18, 25:14).

Eske sala keteıik, budan buryn voleıboldan Qazaqstan chempıonatynda «Qaraǵandynyń» qatarynan besinshi jeńisine qol jetkizgenin jazǵan bolatynbyz.