Voleıboldan el chempıonatynda «Jaıyq» atyraýlyqtardy kambekpen utty

ASTANA. KAZINFORM – Aqtóbe jáne Taldyqorǵan qalalarynda voleıboldan erlerdiń ulttyq lıga komandalary arasynda Qazaqstan chempıonaty úshinshi kishi týrynyń oıyndary bastaldy.

Aqtóbe qalasynda A tobynda ortalyq kezdesý «Atyraý» men «Jaıyq» komandalary arasynda boldy.

Vıktor Kozık jattyqtyratyn oraldyqtar ótken jyly el chempıony atanǵanymen, Qazaqstan kýbogynyń jartylaı fınalynda bes setke sozylǵan tartysty matchta «Atyraýǵa» (bas bapkeri Igor Nıkolchenko) ese jibergen edi.

Qos komanda osyǵan deıin 28 upaı jınap, el chempıonatynyń týrnır kestesinde úshinshi, tórtinshi oryndy bólisip turǵan.

Bul joly alǵashqy eki partııada Igor Nıkolchenko shákirtteri des bermedi – 25:15, 25:20. 

Oıyn barysyn ózgertpek bolǵan Vıktor Kozık biraz almastyrý jasady. Sonyń ishinde Petr Chýrzın men Klım Rıýhov sátti qosyla bildi. Oraldyqtar kambek jasap, qalǵan úsh partııany óz esepterine jazdy – 25:19, 25:17, 15:11. Qorytyndy esep – 3:2, «Jaıyqtyń» paıdasynda. 

Taldyqorǵanda Almatynyń «Býrevestnık» komandasy dál sondaı tartysty básekede «Ushqyn-Kókshetaýdan» aılasyn asyrdy – 3:2 (25:23, 25:23, 35:37, 23:25, 17:15). 

Kishi týr oıyndary 22 qańtarda aıaqtalady.

Eske sala keteıik, budan buryn voleıboldan «Jetisý» erler komandasynyń Qazaqstan kýbogyn jeńip alǵanyn jazǵan edik.