Voleıboldan el chempıonatynda pleı-off básekesine shyqqan komandalar belgili boldy

AQTÓBE. KAZINFORM – Aqtóbe qalasynda voleıboldan erlerdiń Ulttyq lıga komandalary arasynda HHHІІ Qazaqstan chempıonaty tórtinshi týrynyń oıyndary máresine jetti.

Tórtinshi týrdyń sońǵy kúni «Atyraý» «Esilden» (SQO) 3:0 esebimen basym tússe, «Býrevestnık» (Almaty) «Ushqyn-Kókshetaýdy» tize búktirdi – 3:0. 

El chempıony «Pavlodar» Oraldyń «Jaıyǵyn» 3:1 esebimen qapy qaldyrdy. Al «Aqtóbe» «Jetisý jastarynan» aılasyn asyrdy – 3:0.

Osyaısha, tórt týrdyń qorytyndysy boıynsha pleı-off básekesine shyqqan komandalar anyqtaldy. Týrnır kestesinde 63 upaımen jeke-dara kósh bastaǵan pavlodarlyqtar pleı-off kezeńinde 8-oryndaǵy komanda – «Jetisý jastarymen» sheberlik baıqasady. 

Ekinshi satydaǵy «Tarazdyń» qarsylasy «Aqtóbe» bolsa, «Jaıyq» Aqtóbede ótken sońǵy týrda jaqsy oıyn órnegin kórsetken «Atyraýdan» ótýge tyrysady. «Esil» «Býrevestnıkpen» synǵa túsedi. «Ushqyn-Kókshetaý» ǵana pleı-oftan tys qaldy.

Pleı-off básekeleri Pavlodar qalasynda ótedi.

Eske sala keteıik, voleıboldan Qazaqstan chempıonatynda «Pavlodardyń» «Aqtóbeden» aılasyn asyrǵanyn jazǵan bolatynbyz.