Voleıboldan el chempıonaty: «Jetisý» komandasy «Aqtóbe» men «Jaıyqtan» basym tústi

AQTÓBE. KAZINFORM — Taldyqorǵannyń «Jetisý» klýby voleıboldan erlerdiń ulttyq lıga komandalary arasynda HHHIV Qazaqstan chempıonaty birinshi týrynyń qorytyndysy boıynsha kósh bastady.

Marat Adryshev jattyqtyratyn taldyqorǵandyqtar mańyzdy eki kezdesýin sátti ótkizdi.

Keshe «Jetisý» komandasy osyǵan deıin kósh bastap kele jatqan bıylǵy kúmis júldeger «Aqtóbeni» (bas bapkeri Sergeı Trıkoz) asa tartysty matchta tize búktirdi. Birinshi sette voleıbolda sırek kezdesetin 40:38 esebi tirkeldi. Sodan keıin taldyqorǵandyqtar des bergen joq – 25:22, 25:14. Qorytyndy esep – 3:0. Bul alań ıeleriniń jańa maýsymdaǵy alǵashqy jeńilisi edi. 

Búgin «Jetisý» klýby Qazaqstan chempıony, Vıktor Kozık baptaıtyn Oraldyń «Jaıyǵyn» 3:0 (25:17, 25:18, 25:18) esebimen jeńdi. Osylaısha, 18 upaı jınaǵan taldyqorǵandyqtar el birinshiliginde jeke-dara kósh bastady. 

Eske sala keteıik, budan buryn «Jetisý» komandasynyń «Qýanyshty» jeńip, kósh basyna shyqqanyn jazǵan edik.