Voleıboldan Azııa kýbogy: Vetnamdy jeńgen Qazaqstan quramasy óz tobynda birinshi oryn aldy
ASTANA. KAZINFORM — Fılıppınniń Kandon qalasynda voleıboldan áıelder komandalary arasynda ótip jatqan Azııa kýbogy oıyndarynda Qazaqstan quramasy V tobynda birinshi orynǵa ıe boldy.
Toptaǵy sońǵy matchta Asqar Shalqybekovtiń shákirtteri jarystyń basty favorıtteriniń biri Vetnam komandasymen kezdesti.
Osyǵan deıin Qazaqstan qorjynynda 12 upaı bolsa, Vetnamnyń odan bir ǵana upaıy kem edi. Sondyqtan jeńgen qurama óz tobynan birinshi orynmen jartylaı fınalǵa joldama alatyn edi.
Match asa tartysty ótti. Birinshi partııada vetnamdyqtar 25:18 esebimen basym tússe, ekinshisinde qazaqstandyq qyzdar ese qaıyrdy — 25:19. Úshinshisinde Vetnam 25:23 esebimen alǵa shyqqanymen, tórtinshisinde Qazaqstan qaıta teńestirdi — 25:22. Sodan keıin besinshi sette jeńisti julyp aldy — 15:13. Qorytyndy esep — 3:2.
Osylaısha, Qazaqstan quramasy V tobynda 14 upaımen birinshi orynǵa ıe boldy. Vetnam (12 upaı) ekinshi satyda qaldy.
Endi qazaqstandyqtar jartylaı fınalda A tobynda ekinshi oryn alǵan komandamen sheberlik baıqasady. Bul topta kóshbasshylyq úshin Ońtústik Koreıa men Taıbeı talasady. Olardyń ekeýinde de 12 upaıdan bar.
Eske sala keteıik, budan voleıboldan Azııa kýbogynda Qazaqstan quramasynyń tartysty básekede Irandy jeńgenin jazǵan edik.
Sondaı-aq voleıboldan Azııa kýbogynda Qazaqstan quramasy jartylaı fınalǵa joldama aldy.
