Voleıboldan Azııa chempıony atanǵan «Altaı» klýbyn jankúıerler qarsy aldy
SEMEI. QazAqparat – Voleıboldan Azııa chempıony atanǵan «Altaı» klýbynyń oıynshylaryn jankúıerler áýejaıdan qarsy aldy, dep habarlaıdy QazAqparat tilshisi.
Taılandtyń Nakhonratchasıma qalasynda áıelder arasyndaǵy voleıboldan klýbtyq Azııa chempıonatyna Qazaqstan atynan ShQO-nyń «Altaı» jáne Taldyqorǵannyń «Jetisý» klýbtary qatysqan.
Chempıonat qorytyndysy boıynsha altaılyqtar birinshi oryndy jeńip alǵan bolatyn. Sondaı-aq klýb voleıbolshylary birqatar nomınatsııada úzdik dep tanyldy. Atap aıtqanda, Sana Anarqulova – «Óte qundy oıynshy (MVP)», Madına Beket – «Úzdik lıbero», Krıstına Belova – «Úzdik shabýylshy», Nadejda Kodola – «Úzdik oıynshy».
Búgin jarys jeńimpazdaryn Semeı áýejaıynan jankúıerler qoshemetpen qarsy aldy. Sportshylar jarysta jeńimpaz ataný ońaıǵa soqpaǵanyn jetkizdi. Sonymen qatar Taılandaǵy epıdemıologııalyq jaǵdaıǵa baılanysty qoıylǵan qatań shekteýler de qıyndyq týyndatqan.
«Jarystyń alǵashqy kúninen bastap oqshaýlaýda boldyq. Bizge tipti qonaq úı nómirinen shyǵýǵa da ruqsat berilmedi. Ózara sóılese de almaı qaldyq. Ár úsh kún saıyn PTR-test tapsyrdyq. Biraq osyndaı qıyndyqtarǵa qaramastan qaıda jáne ne úshin kelgenimizdi, aldymyzda qandaı maqsat turǵanyn jaqsy bildik. El úmitin aqtaý úshin bar kúshimizdi saldyq», - dedi «Altaı» VK kapıtany Sana Anarqulova.
