Voleıboldan Azııa chempıonaty: «Altaı» tikeleı jartylaı fınalǵa joldama aldy
ÓSKEMEN. QazAqparat - Búgin Óskemende klýbtyq áıelder komandalary arasyndaǵy voleıboldan Azııa chempıonatynyń tórtinshi kúni aıaqtaldy. Barlyǵy tórt match oınalyp, onyń ishinde sońǵy oıyn jergilikti «Altaı» men vetnamdyq ««VTV Bın Den Long An» komandalary arasynda ótti, dep habsrlaıdy QazAqparat tilshisi ShQO dene shynyqtyrý jáne sport basqarmasynyń baspasóz qyzmetine silteme jasap.
Joǵaryda atalǵan eki ujym arasynda tikeleı jartylaı fınalǵa joldama oınatyldy. Bul jaryspen qatar, fýtboldan Álem chempıonatynyń qatar ótkendigin eskersek, B.Aleksandrov atyndaǵy sport saraıyna halyq aıtarlyqtaı mol jınaldy. Qalalyqtar ózderiniń súıikti «Altaı» klýbynyń oıynyn kórýdi jón sanaǵan eken.
Shaharda kimniń qojaıyn ekenin shyǵysqazaqstandyq voleıbolshylar birden baıqatty. Alǵashqy upaıdy vetnamdyqtar oljalasa da, artynsha oıyn basqasha sıpatta órbidi. Sharshakova, Drobyshevskaıa, Anıkonova oıyn saıyn qarqyndaryn údete tústi. Baspasóz konferentsııasynda «Altaıdyń» bas bapkeri ıÝrıı Panchenko aıtqandaı, alǵashqy mınýttardan-aq bar kúshin salyp oınaýdy tapsyrǵan. Osynyń bir dáleli tosqaýylda Natalıa Sharshakova asa saýatty oınady. Jalpy 14 upaı jınasa, bir tosqaýylmen-aq 9 upaı aldy. Tipti, alǵan jaraqatyna qaramaı úzdik shabýylshylardyń biri bolyp qala berdi.
Ary qaraı tartysty oıyn degennen góri, tas-talqan etip utylý dep aıtsaq bolar. Natalıa Sharshakova tosqaýyldaryn jıiletip jiberdi. Al Akılova qarsylastyń bos turǵan aımaǵyna dopty san ret tastap, kórermenderdiń de aıyzyn qandyrdy. Krıstına Anıkonova bolsa, dopty oıynǵa qosarda vetnamdyqtarǵa úlken qıyndyq týdyrǵan edi. «Altaı» upaı boıynsha uzap ketkeni sonshalyq, bas bapker alańǵa Aınash Aıjaryqovany qosty. Ol da óziniń alǵashqy upaıyn alyp úlgerdi.
Qorytyndy esep - 3:0 (25:17, 25:21, 25:15). Kelesi oıynyn óskemendik burymdylar tek seısenbi kúni, tikeleı jartylaı fınalda ótkizedi. Basym jaǵdaıda, olarǵa japonııalyq «NEK Red Rokets» klýby qarsylas atanyp qalýy múmkin. Sebebi bul ujym dúısenbi kúni Qytaılyq Taıpeden kelgen «CMFC»-ten basym túsýleri ábden yqtımal.
Aıta keteıik, ótken jyly aımaq basshysy Danıal Ahmetovtyń bastamasymen elimizde alǵash ret áıelder klýbtary arasynda voleıboldan Azııa chempıonaty ótken bolatyn. Aýqymdy sharany ótkizý úshin B.Aleksandrov atyndaǵy sport saraıynyń alańy jáne jattyǵý bólmeleri tolyq jańartylyp, Azııa voleıbol konfederatsııasy talabyna saı kelgen edi. Endi bıyl atalmysh uıym aýqymdy dodany ekinshi jyl qatarynan shaharymyzda ótkizýge kelisimin berdi.
Foto: ALTAYNEWS
