Voleıboldan áıelder komandalary arasyndaǵy Qazaqstan kýbogynyń shırek fınaldyq oıyndarynda «Jetisý» jeńilissiz kele jatyr
ALMATY. Qazannyń 24-i. QazAqparat /Erlik Erjanuly/ - Voleıboldan áıelder komandalary arasynda Almatyda ótip jatqan Qazaqstan kýbogynyń shırek fınaldyq oıyndarynda Taldyqorǵannyń «Jetisý» komandasy ǵana jeńilissiz kele jatyr,
dep habarlaıdy QazAqparat QR Voleıbol federatsııasynyń baspasóz qyzmetine silteme jasap.
Taldyqorǵandyqtar bıyl shırek fınaldaǵy alǵashqy 4 oıynda da 3:0 esebimen basym tústi. Ótken jylǵy el kýbogynyń jeńimpazyna bul kezdesýlerde «Spartak» (Temirtaý), «Almaty» (Almaty), «Astana» (Astana) jáne «Ertis» (Pavlodar) komandalary tize búkti. Búgin endi barlyq komandalar 1 kúndik úzilis jasap, erteń saıysty qaıta jalǵastyrǵaly otyr. Onda «Astana» men «Spartak», «Metallýrg» pen «Jetisý», «Shyǵys» pen «Gratsııa», «Ertis» pen «Almaty» ózara kúsh synaspaq. Pavlodar men Almaty qalasynyń voleıbolshylary buǵan deıingi kezdesýde tek taldyqorǵandyqtarǵa ǵana ese jibergen bolatyn.
Qazannyń 20-sy kúni bastalǵan respýblıka kýbogynyń shırek fınaldyq oıyndary aldaǵy seısenbi kúni óz máresine jetetin bolady.
