Voleıboldan áıelder arasyndaǵy Qazaqstan chempıonatynda «Qýanysh» kósh bastap keledi

Petropavl qalasynda áıelderdiń Ulttyq lıga komandalary arasynda HHHІІ Qazaqstan chempıonaty ekinshi týrynyń oıyndary máresine jetti, dep habarlaıdy Kazinform. 

Bıyl Qazaqstan kýboginiń ıegeri atanǵan Soltústik Qazaqstan oblysynyń «Qýanysh» komandasy (bapkeri Azamat Esimov) óz alańynda eshkimge des bergen joq.

Birinshi týr aıasynda sýperkýbok úshin matchta almatylyqtarǵa 2:3 esebimen ese jibergennen keıin soltústikqazaqstandyqtar ázirge jeńilip kórgen emes.

Ekinshi týrda «Qýanyshtan» 2:3 esebimen utylǵan Marko Grshıch jattyqtyratyn «Jetisý» komandasy ǵana bir upaı oljalaı aldy.

Osylaısha, 32 upaı jınaǵan «Qýanysh» kósh basyna shyqsa, Óskemenniń «Bereli» (31 upaı) ony ókshelep keledi.

Sońǵy, 27 jeltoqsan kúni ortalyq kezdesý «Almaty» men «Turan» (Túrkistan) komandalary arasynda ótti. Asqar Shalqybekov baptaıtyn «Turan» klýby 3:0 esebimen utyp, týrnır kestesinde 28 upaımen úshinshi orynǵa kóterildi. Rafael Gılıazýtdınovtiń shákirtteri 25 upaımen tórtinshi, «Jetisý» (22 upaı) besinshi orynda qaldy.

Endi Ulttyq lıga básekeleri jańa jylda jalǵasady.

Eske sala keteıik, budan buryn «Almaty» klýbynyń voleıboldan sýperkýbok ıegeri atanǵanyn jazǵan edik.