Voleıboldan áıelder arasynda Qazaqstan chempıonatynda kóshbasshy aýysty

ASTANA. KAZINFORM – Pavlodar qalasynda voleıboldan áıelderdiń Ulttyq lıga komandalary arasynda HHHІІ Qazaqstan chempıonatynyń úshinshi týrynda kóshbasshy aýysty. 

Seısenbi kúni ortalyq kezdesý osyǵan deıin kósh bastap kele jatqan «Qýanysh» (SQO) pen óskemendik «Berel» arasynda ótti.

Ulttyq lıgaǵa bıyl qosylǵanyna qaramastan, belgili maman Rıshat Gılıazýtdınov jattyqtyratyn óskemendik klýb beldi oıynshylarmen jasaqtalǵan bolatyn. Budan buryn «Berel» komandasy «Qýanyshqa» 1:3 esebimen ese jibergen edi. Bul joly óskemendikter 3:0 (25:22, 25:22, 25:23) esebimen jeńip, 37 upaımen birinshi orynǵa kóterildi. Azamat Esimovtiń shákirtteri 35 upaımen ekinshi satyǵa yǵysty. 

Taǵy bir ortalyq kezdesýde «Jetisý» (Taldyqorǵan) men «Turan» (Túrkistan) jolyqty. Sana Anarqulova bastaǵan túrkistandyq qyzdar (bas bapkeri Asqar Shalqybekov) 7 upaı aıyrmashylyǵymen alda turǵanymen, birinshi partııada sol basymdylyqty saqtaı almady – 23:25. Budan keıin serbııalyq maman Marko Grshıchtiń shákirtteri oıyn tizginin bergen joq – 25:20, 26:24. Osylaısha bul eki komandanyń upaılary (28) teńesip, dop aıyrmashylyǵy boıynsha «Jetisý» úzdik úshtikke ilikti.

Búgin «Qaraǵandy» komandasy taldyqorǵandyq «Aıqarakózden» 3:1 (25:18, 25:22, 20:25, 25:15) esebimen aılasyn asyryp, týrnır kestesinde 8-orynǵa kóterildi. Bul - qaraǵandylyqtardyń qatarynan ekinshi jeńisi. «Aıqarakóz» 9-orynǵa túsip qaldy.

Eske sala keteıik, budan buryn Pavlodarda voleıboldan áıelder arasynda Qazaqstan chempıonatynyń úshinshi týry bastalǵanyn jazǵan bolatynbyz.