Voleıboldan aýǵan soǵysynyń ardagerleri arasynda týrnır ótti - Qyzylorda
QYZYLORDA. QazAqparat - Qyzylorda qalasy «Muz aıdyny» sport kesheninde voleıboldan Aýǵan soǵysynyń ardagerleri arasynda respýblıkalyq týrnır ótti, dep habarlady QazAqparat tilshisi oblystyq dene shynyqtyrý jáne sport basqarmasyna silteme jasap.
Bıyl ekinshi márte uıymdastyrylǵan týrnırge Astana qalasy, Almaty, Atyraý, Aqtóbe, Qaraǵandy, Pavlodar jáne Qyzylorda oblystarynan 7 komanda sheberlik baıqasty.
Jarystyń ashylý saltanatynda oblys ákimi Qyrymbek Kósherbaev jáne QR Parlamenti Májilisiniń depýtaty, Aýǵan soǵysy ardagerleri uıymdarynyń «Qazaqstan ardagerleri» qaýymdastyǵynyń tóraǵasy, Aýǵan soǵysynyń ardageri Baqytbek Smaǵululy jarysqa qatysýshylarǵa sáttilik tiledi.
Básekede 48-58 jas aralyǵyndaǵy aýǵan soǵysyna qatysqan ardagerler synǵa tústi. Nátıjesinde Almaty oblysynyń komandasy Astana qalasynyń ardagerlerin 2:1 esebimen jeńip, týrnır jeńimpazy atandy. Úshinshi oryndy Qyzylorda oblysynyń komandasy ıelendi.
Jarysta «Úzdik oıynshy» nomınatsııasymen Azat Mentaev (Atyraý), Qýat Imanhanov (Almaty), Sergeı Lıýbovskıı (Astana q.), Aqylbek Amanov (Qaraǵandy), Saparǵalı Muqashev (Aqtóbe), Myrzabek Abraev (Pavlodar) jáne «Belsendi qatysqany úshin» Atyraý, Aqtóbe, Pavlodar oblystarynyń komandalary marapattaldy.
Jeńimpaz jáne júldeger komandalar gramota, kýbok, medal jáne aqshalaı sertıfıkattar tabystaldy.
