Voleıboldan «Álemdik Gran-Prı-2013» maýsymynyń kezeńdik jarystarynyń biri Almatyda ótýi múmkin
ALMATY. 6 jeltoqsan. QazAqparat - Halyqaralyq voleıbol federatsııasy áıelder arasyndaǵy «Gran-Prı-2013» maýsymynyń kirispe kezeńiniń kúntizbesin jarııalady. Bıyl bul dúbirli dodaǵa AQSh, Argentına, Bolgarııa, Brazılııa, Germanııa, Gollandııa, Domınıkan, Japonııa, Italııa, Qazaqstan, Qytaı, Kýba, Polsha, Pýerto-Rıko, Reseı, Serbııa, Taıland, Túrkııa, Chehııa jáne Afrıka qurlyǵynan bir memleket qatyspaq.
Birinshi týr 2-4 tamyzda Italııada ótedi. Onda qazaqstandyqtar «E» tobynda Italııa, Germanııa, Argentına quramalarymen saıysqa túsedi. Odan keıin 9-11 tamyzda Polshadaǵy ekinshi týrda «N» tobynda Japonııa, Germanııa, Polsha voleıbolshylarymen kezdesedi. Al Qazaqstan voleıbol federatsııasy tehnıkalyq rásimderdi bekitip, maquldasa 16-18 tamyzda óz alańyńda «K» tobynda Brazılııa, Gollandııa jáne Kýba komandalarymen kúsh synasady.
Jalpy bıyl Álemdik Gran-Prı dodasyna qatysatyn komandalar sany 16-dan 20-ǵa deıin ulǵaıyp otyr. Halyqaralyq voleıbol federatsııasy onyń qataryna Eýropa chempıony retinde Reseı, Álem kýbogynyń ıegeri retinde Italııa, Bıylǵy «Gran-Prı» jarysynyń qola júldegeri retinde Túrkııa men Germanııany qosty.
Qazaqstan quramasy onda 9 kezdesý ótkizedi. Onda qonaqta bir-bir matchtan Italııa men Polshamen, al beıtarap alańda Argentına men Japonııamen jáne eki ret Germanııamen oınaıdy. Al óz alańynda London Olımpıadasynyń chempıony Brazılııa jáne Kýba men Gollandııa komandalarymen kezdesedi. Aqtyq týrnır Japonııadaǵy Sapporoda 28 tamyz ben 1 qyrkúıek aralyǵynda ótedi. Oǵan alań qojaıyndarynan bólek kirispe kezeńiniń qorytyndysy boıynsha 5 úzdik qurama katysatyn bolady.
