Voleıboldan álem chempıonaty: Qazaqstan quramasy Germanııaǵa ese jiberdi
ASTANA. QazAqparat - Qazaqstan quramasy voleıboldan áıelder arasyndaǵy álem chempıonatynda ekinshi kezdesýin Germanııaǵa qarsy ótkizdi, dep habarlaıdy QazAqparat tilshisi.
Búgingi kezdesýde qazaqstandyq voleıbolshylar tájirıbeli qarsylasyna laıyqty deńgeıde oıyn kórsetti. Germanııa quramasy Eýropa chempıonatynda tórt márte júldeger qatarynan kóringen. Sondaı-aq Gran-prı jáne Eýrolıga týrnırinde jetistikke jetti.
Sondyqtan el quramasyna olarmen oıyn ońaıǵa túsken joq. Alǵashqy eki sette qazaqstandyq voleıbolshylar qarsylasyna 15:25, 18:25 esebimen ese jiberip qoıdy.
Al úshinshi sette tartysty oıyn ótti. Nátıjesinde germanııalyqtardyń basymdyǵymen atalǵan set 21:25 esebimen aıaqtaldy.
Qazaqstandyq voleıbolshylar S tobynda synǵa túsetini belgili. Qarsylastary – AQSh, Serbııa, Germanııa, Bolgarııa jáne Kanada.
Endi el quramasy 29 qyrkúıekte Kanadamen kezdesedi.
Dúbirli doda Nıderland jáne Polsha memleketterinde 23 qyrkúıek pen 15 qazan aralyǵynda ótkiziledi. Onda barlyǵy 24 qurama qatysyp, tórt topta baq synaıdy.
Eske salsaq, budan buryn qazaqstandyq voleıbolshylar AQSh-tan jeńilip qalǵan edi.
Foto: volley.kz
