Voleıboldan ÁCh: «Jetisý» ekinshi kezdesýinde qalaı oınady

ASTANA. KAZINFORM — Brazılııanyń San-Paýlý qalasynda ótip jatqan voleıboldan klýbtyq álem chempıonatynda qazaqstandyq «Jetisý» komandasy ekinshi ret alańǵa shyqty.

Taldyqorǵandyqtar «A» tobyndaǵy alǵashqy oıynynda Italııanyń «Savıno Del Bene» (Italııa) klýbyna 0:3 esebimen ese jibergen edi. Bul joly serbııalyq maman Marko Grshıchtiń shákirtterine Perýdiń «Alıantsa Lıma» komandasymen kim myqtyny anyqtady. 

Ár toptan eki úzdik klýb jartylaı fınalǵa joldama alatyndyqtan, «Jetisý» aıanyp qalǵan joq. 

Tartysty órbigen birinshi partııany taldyqorǵandyqtar óz esebine jazdy — 26:24. Ekinshi sette perýlikter 5:1 esebimen alǵa ketti. «Jetisý» esepti qysqartqanymen, «Alıantsa Lıma» basymdylyqty saqtap qaldy — 25:21. Budan keıin de sál-pál sáttilik perýlik klýb jaǵynda boldy — 25:23, 26:24. Qorytyndy esep — 3:1.

— Árıne, jeńilip qalǵanymyz ókinishti. Klýbtyq álem chempıonatynda alǵashqy jeńisimizge qol jetkizgimiz keldi. Qyzdar baryn saldy. Múmkin, osyndaı deńgeıde sál-pál tájirıbemiz jetispegen bolar. Birinshi partııany jeńip, batyl qadam jasadyq. Táýekel de boldy. Oıyndy jaqsarta túsý úshin bolashaqta áli de jumys isteýge týra keledi, - deıdi komanda bapkeri M.Grshıch.

Endi «Jetisý» óz tobyndaǵy sońǵy oıynyn 12 jeltoqsanda alań ıeleri — «Ozaský San-Krıstovanmen» (Brazılııa) ótkizedi.

Buǵan deıin brazılııalyqtar «Alıantsa Lımany» 3:0 (25:14, 25:17, 25:18) esebimen jeńgen edi. Biraq ekinshi kezdesýinde Italııanyń «Savıno Del Bene» klýbyna ese jiberdi — 0:3 (29:31, 22:25, 15:25). Osylaısha, «A» tobynda ıtalııalyq klýb 6 upaımen kósh bastap tur.

Eske sala keteıik, budan buryn klýbtar arasyndaǵy álem chempıonatynda «Jetisý» komandasy baq synaıtynyn jazǵan edik.

«Jetisý» voleıbol komandasy álem chempıonatynda alǵashqy kezdesýin ótkizdi.