Voleıboldan ÁCh: Qazaqstan jastar quramasy tarıhı jeńiske ıe boldy

ASTANA. KAZINFORM — Qytaıdyń Tszıanmen qalasynda voleıboldan 21 jasqa deıingiler arasynda HHІІІ álem chempıonatynda Qazaqstan quramasy úshinshi kezdesýin ótkizdi. 

Bul joly Sergeı Trıkoz jattyqtyratyn qazaqstandyqtar V tobynda Pýerto-Rıko komandasyna tap keldi.

Qos qurama da bastapqy eki oıynynda utylyp qalǵan edi. Sondyqtan olar jeńis úshin baryn saldy.

Tartysty órbigen birinshi partııany qazaqstandyqtar óz esebine jazdy — 25:23. Ekinshisinde 25:21 esebi tirkeldi. Úshinshi sette qazaqstandyq jastar qarqynyn údetti — 25:16. Qorytyndy esep — 3:0.

Osylaısha, álem chempıonatyna óz tarıhynda birinshi ret qatysyp jatqan Qazaqstan jastar quramasy alǵashqy jeńisine qol jetkizdi.

Sergeı Trıkozdyń shákirtteri 25 tamyz kúni Polsha quramasymen oınaıdy. 

Eske sala keteıik, budan buryn voleıboldan álem chempıonatynda Qazaqstan jastar quramasynyń alǵashqy upaıyna qol jetkizgenin jazǵan edik.