Voleıboldan ÁCh: Qazaqstan jastar quramasy Koreıany jeńip, pleı-off kezeńine joldama aldy

ASTANA. KAZINFORM — Qytaıdyń Tszıanmen qalasynda voleıboldan 21 jasqa deıingiler arasynda ótip jatqan HHІІІ álem chempıonatynda Qazaqstan quramasy ekinshi jeńisine qol jetkizdi.

Sergeı Trıkoz jattyqtyratyn qazaqstandyqtar keshe V tobynda kósh bastap kele jatqan komandalardyń biri – Polshaǵa 0:3 (21:25, 21:25, 22:25) ese jibergen edi.

Búgin Qazaqstan quramasy Ońtústik Koreıamen sheshýshi oıynyn ótkizdi. Osyǵan deıin qazaqstandyqtar qorjynynda 4 upaı bolsa, ońtústikkoreıalyqtar (6 upaı) alda turǵan edi.

Sondyqtan qazaqstandyqtarǵa úsh upaı alý kerek bolatyn.

Birinshi partııada ońtústikkoreıalyqtar 25:17 esebimen basymdylyq tanytty. Degenmen budan keıin S.Trıkoz shákirtteri qatarynan eki setti aldy – 25:23, 25:22.

Tórtinshi partııa barysynda Ońtústik Koreıa komandasy 13:9 esebimen alda turdy.

Qazaqstandyqtar tarazy basyn teńestire bildi – 14:14. Sosyn 18:15 esebimen alǵa shyqty. Aqyry jeńis núktesin qoıdy – 25:22.

Qorytyndy esep – 3:1, Qazaqstannyń paıdasynda. 

Osylaısha, álem chempıonatyna óz tarıhynda alǵash ret qatysyp jatqan qazaqstandyqtar óz tobynan úshinshi orynmen pleı-off kezeńine shyqty.

Qazaqstan voleıbol federatsııasynyń vıtse-prezıdenti Ermek Syrlybaevtyń aıtýynsha, qazirdiń ózinde qazaqstandyq jastar álem chempıonatynda úzdik 16 komandanyń qataryna endi.

- Qazaqstan jastar quramasy sheber oıynymen mamandar men jankúıerlerdi qýantyp otyr. Endi pleı-off kezeńinde D tobynda ekinshi orynǵa ıe bolǵan Frantsııa quramasymen oınaıdy, - dedi Kazinform tilshisine E.Syrlybaev.

Eske sala keteıik, budan buryn voleıboldan álem chempıonatynda Qazaqstan jastar quramasynyń tarıhı jeńiske ıe bolǵanyn jazǵan edik.