Voleıboldan ÁCh: Qazaqstan jastar quramasy alǵashqy upaıyna qol jetkizdi

ASTANA. KAZINFORM — Qytaıdyń Tszıanmen qalasynda voleıboldan 21 jasqa deıingiler arasynda HHІІІ álem chempıonaty ótip jatyr.

Sergeı Trıkoz jattyqtyratyn Qazaqstan jastar quramasy dúnıejúzilik dodaǵa óz tarıhynda alǵash ret qatysýǵa múmkindik aldy. 

Keshe qazaqstandyqtar V tobyndaǵy bastapqy kezdesýin álem jáne Azııa chempıony – Iran quramasymen ótkizip, 1:3 (19:25, 25:21, 23:25, 17:25) esebimen ese jiberdi.

Búgin Soltústik Amerıka chempıonatynyń kúmis júldegeri – Kanada komandasymen oıyn tipti tartysty bolyp, bes setke sozyldy. Birinshi partııanyń ózinde-aq qazaqstandyqtar talasyp baǵyp, 32:34 esebimen jol berdi.

Budan keıin S.Trıkozdyń shákirtteri 25:23, 25:22 esebimen basym tústi. Tórtinshi sette kanadalyqtar tarazy basyn teńestirdi – 25:21. Besinshi, sheshýshi sette qazaqstandyqtar 7:4 esebimen alǵa ketkenimen, sol basymdylyqty saqtaı almady – 13:15.

Qorytyndy esep – 3:2, Kanadanyń paıdasynda. Degenmen Qazaqstan jastar quramasy bir upaıǵa qol jetkizdi.

Erteń qazaqstandyqtar osyǵan deıin eki ret jeńilgen Pýerto-Rıko komandasymen alańǵa shyǵady.

Eske sala keteıik, budan buryn Oraldyń «Jaıyq» klýby Ortalyq Azııa chempıonatynda top jarǵanyn jazǵan edik.