Voleıbol: «Jetisýdyń» Azııa chempıondar lıgasyndaǵy alǵashqy qarsylasy belgili boldy
ASTANA. KAZINFORM — Ońtústik Koreıanyń Inchhon qalasynda 26-30 sáýirde voleıboldan áıelder komandalary arasynda Azııa chempıondar lıgasynyń oıyndary ótedi.
Jarystyń ótken jylǵy jeńimpazy «Jetisý» voleıbol klýby (Taldyqorǵan) jerebe qorytyndysyna sáıkes shırek fınalda Qytaıdyń BAIC komandasymen sheberlik baıqasady.
Taldyqorǵandyqtar jartylaı fınalǵa ótse, týrnırdiń taǵy bir favorıti japonııalyq nemese ındonezııalyq klýbtyń bireýimen kezdesedi.
Jerebede joly bolǵan alań ıeleri — ońtústikkoreıalyqtar shırek fınalda kýveıttik Salwa Al Sabah klýbymen oınaıdy. Ony utsa, ırandyq nemese taılandtyq komandanyń qaı jeńgenimen fınal joldamasyn sarapqa salady.
Doda jeńimpazy men fınalısi 2026 jylǵy klýbtyq álem chempıonatyna joldama alady.
Ótken jyly Fılıppınde ótken Azııa chempıondar lıgasynda «Jetisý» top jarǵan bolatyn.
Sodan keıin serbııalyq maman Marko Grshıchtiń shákirtteri Brazılııanyń San-Paýlý qalasynda klýbtyq álem chempıonatynda óner kórsetti.
Búgin Petropavl qalasynda voleıboldan áıelderdiń ulttyq lıga komandalary arasynda Qazaqstan chempıonaty tórtinshi úlken týry jalǵasyn tabady.
Týrnır kestesinde 76 upaımen kósh bastap kele jatqan taldyqorǵandyqtar «Aqtóbemen» alańǵa shyǵady.
Eske sala keteıik, budan buryn «Jetisý» klýbynyń alǵash ret Azııa chempıondar lıgasynyń jeńimpazy atanǵanyn jazǵan bolatynbyz.
Sondaı-aq «Jetisý» klýby chempıonat bastalǵannan beri upaıdan shashaý shyǵarmaı keledi.
«Qýanysh» klýby óz alańynda «Berelden» utylyp qaldy.
