Voleıbol: «Jetisý» men «Aqtóbe» Qazaqstan chempıonatynyń fınalyna joldama aldy
ASTANA. KAZINFORM — Aqtóbe qalasynda voleıboldan erlerdiń ulttyq lıga komandalary arasynda Qazaqstan chempıonatynyń jartylaı fınaldyq básekeleri máresine jetti.
Marat Adryshev jattyqtyratyn «Jetisý» klýby turaqty chempıonatty birinshi orynmen aıaqtaǵan edi. Pleı-off kezeńinde de taldyqorǵandyqtar qarqynyn joǵaltqan joq.
«Jetisý» búgin «Atyraý» klýbyn taǵy da 3:0 (25:20, 25:23, 26:24) esebimen jeńdi.
«Aqtóbe» men «Jaıyq» (Oral) arasyndaǵy ekinshi jartylaı fınaldyq match asa tartysty ótti.
Alań ıeleri birinshi partııada 26:24 esebimen basymdylyq tanytty. Budan keıin oraldyqtar qatarynan eki setti aldy — 25:20, 25:22. Degenmen aqtóbelikter óz múmkindigin jibergen joq — 25:18, 15:9. Qorytyndy esep — 3:2.
Osylaısha, «Jetisý» men «Aqtóbe» (bas bapkeri Sergeı Trıkoz) chempıondyq ataqty sarapqa salady.
Ótken jylǵy chempıon «Jaıyq» pen «Atyraý» qola júlde úshin alańǵa shyǵady.
Eske sala keteıik, budan buryn voleıboldan fınaldyq kezeńde «Aqtóbeniń» kambekpen «Jaıyqty» jeńgenin jazǵan bolatynbyz.
