Voleıbol: «Jetisý» komandasy «Qýanyshty» jeńip, kósh basyna shyqty

ASTANA. KAZINFORM — Túrkistan qalasynda voleıboldan áıelderdiń ulttyq lıga komandalary arasynda HHHIV Qazaqstan chempıonatynyń birinshi týry aıaqtaldy.

Seısenbi kúni ortalyq kezdesý bıylǵy el chempıony «Jetisý» (Taldyqorǵan) men qola júldeger «Qýanysh» (SQO) arasynda ótti.

Serbııalyq maman Marko Grshıch jattyqtyratyn taldyqorǵandyq klýbqa jańa maýsymda reseılik tájirıbeli oıynshy Marııa Frolova qosyldy. 

Al ıÝrıı Panchenko baptaıtyn «Qýanyshtyń» quramyn Serbııada ótken bir maýsymnan keıin elge oralǵan Qazaqstan ulttyq quramasynyń kapıtany, Oral voleıbolynyń túlegi Sana Jarlyǵasova kúsheıtti.

Osyǵan deıin 18 upaıdan jınaǵan «Qýanysh» pen «Jetisý» kósh bastap kele jatqan edi. Dúısenbi kúni bıylǵy kúmis júldeger «Berel» (Óskemen) komandasyn 3:0 (25:22, 25:22, 25:23) esebimen jeńgen soltústikqazaqstandyq qyzdar jańa maýsymda joǵary orynnan dámeli ekendikterin kórsetti.

Búgin alǵashqy partııada «Jetisý» 25:19 esebimen basym tústi. Sodan soń eki setti ıÝ.Panchenko shákirtteri aldy – 25:18, 25:18. Degenmen taldyqorǵandyqtar tarazy basyn teńestirdi – 25:15. Sheshýshi, besinshi partııada «Qýanysh» 10:8 esebimen alda turǵanymen, sol múmkindigin paıdalana almady – 12:15. Osylaısha bes partııa qorytyndysy boıynsha 3:2 esebimen «Jetisý» jeńiske jetti. 

Bul jeńisinen keıin el birinshiliginde taldyqorǵandyqtar 20 upaımen jeke-dara kósh bastady. «Qýanysh» (19 upaı) ekinshi, «Berel» (14) úshinshi orynǵa jaıǵasty. 

Búgin serbııalyq maman Vladımır Vasovıch jattyqtyratyn óskemendikter asa tartysty matchta «Qaraǵandyny» 3:2 (28:30, 25:20, 23:25, 25:9, 15:12) esebimen tize búktirdi. 

Eske sala keteıik, budan buryn «Jetisý» klýbynyń alǵash ret Azııa chempıondar lıgasynyń jeńimpazy atanǵanyn jazǵan edik.