Voleıbol: «Jetisý» komandasy qatarynan 14 matchta jeńiske jetti

ASTANA. KAZINFORM — Voleıboldan áıelderdiń ulttyq lıga komandalary arasynda HHHIV Qazaqstan chempıonatynda Taldyqorǵannyń «Jetisý» komandasy jeke-dara kósh bastap keledi.

Taldyqorǵan qalasyndaǵy ekinshi týrda jeksenbi kúni ortalyq matchta «Jetisý» men «Qýanysh» (SQO) komandalary ózara myqtyny anyqtady.

Alǵashqy eki partııany ıÝrıı Panchenko jattyqtyratyn soltústikqazaqstandyqtar óz esebine jazdy – 25:23, 25:19. Alaıda budan keıin serbııalyq Marko Grshıchtiń shákirtteri óz alańynda jankúıerlerdi jerge qaratpaı, kambek jasaı bildi – 25:21, 25:23, 15:11. Qorytyndy esep – 3:2.

«Jetisý» sapyndaǵy reseılik legıoner Marııa Frolova oıyn týraly óz pikirin bildirdi.

- Bastapqy eki partııa oıdaǵydaı bolmady. Degenmen ekinshi settiń ózinde utatynymyzǵa sendim. Sodan keıin jınala bilip, komandalyq oıyn nátıjesinde jeńiske jettik. Bizdi qoldaǵan jankúıerlerimizge alǵysymyzdy aıtamyz, - dedi M.Frolova.

Osylaısha, qatarynan 14 kezdesýin utyspen aıaqtaǵan taldyqorǵandyqtar upaı sanyn 40-qa jetkizip, jańa maýsymda da chempıondyqtan basty úmitker ekendikterin baıqatty.

«Qýanysh» 36 upaımen ekinshi orynda qaldy. 2025 jylǵy kúmis júldeger «Berel» (Óskemen) 31 upaımen úzdik úshtikti túıindep tur.

Eske sala keteıik, budan buryn voleıboldan Qazaqstan chempıonatynda «Jetisý» klýbynyń jeńis serııasyn 9 matchqa jetkizgenin jazǵan edik.