Voleıbol: «Jetisý» klýby toǵyzynshy ret Qazaqstan chempıony atandy

ASTANA. KAZINFORM – Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonaty máresine jetti.

Alań ıeleri «Berel» men «Jetisý» (Taldyqorǵan) klýbtary chempıondyq ataq úshin úshinshi, sheshýshi kezdesýin ótkizdi.

Osyǵan deıin taldyqorǵandyqtar el birinshiliginde segiz ret úzdik atanǵan edi. Olar sońǵy ret 2020 jyly jeńimpaz boldy. Al qurylǵanyna kóp bolmaǵan «Berel» ótken jyly kúmis júldeni qanaǵat tutqan edi.

Bul joly birinshi partııada Rıshat Gılıazýtdınov jattyqtyratyn óskemendikter sátti oınady – 25:22. Alaıda osydan keıin serbııalyq maman Marko Grshıchtiń shákirtteri ózderiniń sheberlikteriniń basym ekendigin dáleldedi. Komanda kapıtany, ýkraınalyq Karına Denısova bastaǵan jetisýlyqtar chempıondyqqa tán óner kórsete bildi – 25:19, 25:12, 25:20. 

«Berel» ekinshi jyl qatarynan kúmis medalǵa ıe bolsa, «Qýanysh» úzdik úshtikti túıindedi.

Ótken jylǵy el chempıony «Turan» (Túrkistan) tórtinshi orynǵa taban tiredi.

«Aqtóbe» komandasyn asa tartysty ótken úshinshi oıynda 3:2 (24:26, 28:26, 25:17, 21:25, 15:12) esebimen tize búktirgen qaraǵandylyqtar 5-satyǵa ornyqty. 

Eske sala keteıik, budan buryn chempıondyq básekede «Bereldiń» óz alańynda «Jetisýdan» ese qaıtarǵanyn jazǵan bolatynbyz.