Voleıbol: «Jetisý» klýby chempıonat bastalǵannan beri upaıdan shashaý shyǵarmaı keledi
ASTANA. KAZINFORM – Óskemen jáne Petropavl qalalarynda voleıboldan áıelderdiń ulttyq lıga komandalary arasynda Qazaqstan chempıonatynyń tórtinshi kishi týry támamdaldy.
Óskemende byltyrǵy el chempıony jáne bıylǵy sýperkýbok ıegeri «Jetisý» (Taldyqorǵan) men týrnır kestesinde tórtinshi orynda kele jatqan «Turan» (Túrkistan) komandasy sheberlik baıqasty. Bul kezdesýde serbııalyq Marko Grshıch jattyqtyratyn taldyqorǵandyqtar 3:1 (25:14, 25:14, 25:27, 25:17) esebimen jeńiske jetti.
Osylaısha, «Jetisý» klýby upaı sanyn 70-ke jetkizdi. Taldyqorǵandyqtar 2025-2026 jylǵy chempıonat bastalǵannan beri 24 oıynda birde-bir upaı joǵaltqan joq. Tek Qazaqstan kýbogynyń jartylaı fınalynda ǵana «Qýanyshqa» ese jiberdi.
Óskemenniń «Bereli» óz alańynda «Almatydan» aılasyn asyrdy – 3:0 (25:19, 26:24, 25:21). Týrnırlik kestede «Berel» 52 upaımen úshinshi orynda keledi.
Al Petropavlda «Qýanysh» komandasy «Aqtóbeden» aılasyn asyrdy – 3:0 (25:13, 25:12, 25:21). Osy jeńisinen keıin soltústikqazaqstandyqtar 63 upaımen ekinshi satyǵa jaıǵasty.
Besinshi oryndaǵy «Qaraǵandy» asa tartysty matchta «Astanany» qapy qaldyrdy – 3:2 (22:25, 25:19, 24:26, 25:17, 15:12).
Tórtinshi kishi týr qorytyndysy boıynsha ár komandadan úzdik oıynshylar anyqtaldy.
Eske sala keteıik, budan buryn «Jetisý» qyzdarynyń óskemendik klýbtan aılasyn asyrǵanyn jazǵan edik.
