Voleıbol: «Jetisý» klýby 21 kezdesý boıy jeńilmeı keledi

ASTANA. KAZINFORM — Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonaty úshinshi úlken týrynyń oıyndary aıaqtaldy. 

Sońǵy kúni ótken jylǵy el chempıony «Jetisý» (Taldyqorǵan) men qola júldeger «Qýanysh» (SQO) klýbtary sheberlik baıqasty.

Birinshi partııada serbııalyq maman Marko Grshıch jattyqtyratyn taldyqorǵandyqtar 25:23 esebimen basym tústi. 

Ekinshi sette ıÝrıı Panchenkonyń shákirtteri setboldy paıdalana almady — 25:27. Degenmen úshinshi partııada soltústikqazaqstandyqtar jınala bildi — 25:22. Alaıda kelesi sette taldyqorǵandyqtar jeńistik bermedi — 25:17.

Qorytyndy esep — 3:1.

Osylaısha, chempıonat barysynda 21 kezdesý boıy jeńilmeı kele jatqan «Jetisý» upaı sanyn 61-ge jetkizdi. 

«Qýanysh» 54 upaımen ekinshi orynda keledi.

Óskemenniń «Bereli» óz alańyndaǵy sońǵy básekede «Qaraǵandyny» 3:0 (25:11, 25:18, 25:12) esebimen utyp, 46 upaımen úshinshi satyda qaldy.

«Aqtóbeden» 3:0 (25:16, 25:21, 25:23) esebimen aılasyn asyrǵan «Turan» (Túrkistan) 33 upaımen tórtinshi orynǵa turaqtady.

Eń sońǵy orynda kele jatqan «Astana» sensatsııa jasap, «Almaty» klýbyn 3:2 (25:21, 23:25, 12:25, 25:18, 15:12) utyp, alǵashqy eki upaıyna qol jetkizdi. 

Kezdesýlerden keıin ár komandadan úshinshi úlken týrdyń úzdik oıynshylary marapattaldy.
Eske sala keteıik, budan buryn voleıboldan «Qýanyshtyń» el kýbogynda «Turanǵa» ketken esesin chempıonatta qaıtarǵanyn jazǵan edik.