Voleıbol: «Jetisý» qatarynan segiz ret jeńiske jetti

PETROPAVL. KAZINFORM – Petropavl qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynyń úshinshi týrynda ortalyq kezdesý «Jetisý» men «Qýanysh» (SQO) arasynda boldy.

Serbııalyq maman Marko Grshıch jattyqtyratyn taldyqorǵandyqtar ótken jyly kýbok pen sýperkýbokty jeńip alǵan edi.

«Jetisý» chempıonatta da «Berel» (Óskemen) klýbymen birge kósh bastap keledi. Al Azamat Esimovtiń shákirtteri óz alańynda baryn salatyny anyq edi. Olar birinshi partııany (25:21) óz esebine jazǵanymen, ári qaraı jalǵastyra almady – 23:25, 11:25, 13:25. Jalpy esep – 3:1, «Jetisýdyń» paıdasynda.

Osylaısha, taldyqorǵandyqtar qatarynan segizinshi kezdesýin jeńispen aıaqtady.

Sondaı-aq óskemendikter de «Gratsııa KZ» (Oral) komandasyn 3:0 (25:5, 25:20, 25:11) esebimen oısyrata utty.

Senbi kúni komandalar demalady, jeksenbide oıyndar qaıta bastalady.

Dúısenbide «Berel» men «Jetisý» komandalary ózara kezdesip, qaı myqtyny anyqtaıdy. Óskemendikter jeńis sany (18) jóninen alda kele jatsa, taldyqorǵandyqtar – upaıdy (53) eń kóp jınaǵan komanda.

Eske sala keteıik, budan buryn Petropavldaǵy týrda úsh okmanda jeńilissiz kele jatqanyn jazǵan bolatynbyz.

Sondaı-aq «Aqtóbe» komandasy «Almatyny» jeńdi.